Ane Hansen: Espersen ingasattajaarpoq

maajip 26-at 2006 14:18

Nunatta Canadami puisit amersisaleqqinneranut akerliulluni sakkortuumik oqaaseqarnini, Inatsiseqarnermut ministerip Lene Espersenip utertittariaqarpai, taama isumaqarpoq Inatsisartut Aalisarnermut Piniarnermullu Ataatsimiititaliaani siulittaasoq IA-meersoq Ane Hansen.

Lene Espersen isumaqarpoq Canadamiut avaartaallutik puisinniartarnerat uumasunik killeqanngitsumik naalliutsitsinerusoq. Canadamit amersisaleqqinneq nunatsinnut tusaamanerlutsitsilissammat, nunatta Canadamit amersisaleqqinnera naalakkersuisunit eqqarsaatigeqqinneqartariaqartoq Lene Espersen oqarpoq. Taama uparuaanermut Ane Hansen ima akissuteqarpoq:

- Ataatsimiititalimi suli eqqartorsimanngilarput kisianni isumaqarpunga ilisimasaqanngissutsimik tunuliaqarluni taama taamatut qisuariartoq.

Ane Hansen Lene Espersenimut akilluni aamma oqarpoq Espersen puisinut tunngasunik soqutiginninnerulaarsimasuuguni, ilisimatusarneq tunngavigalugu paasisat annertuut pigineqartut takoqqaarsimasinnaagaluarai.

- Nammcomi akuerisaavoq, puisinik taama toqutsigasuarluni avaarlugit toqutsisarneq. Puisinniarnermik ilisimasaqarnerulaaraluaruni aamma takusimassagaluarpaa nunatsinni puisinniariaaseq avaartaanermiit ilaatigut peqarniinerusartoq.

Taamaattumik taamatut qisuariarneq isumaqarpunga ingasattajaarnerusoq aammalu ilisimasaqannginermik aallaaveqartoq.

Ane Hansen neriuppoq Naalakkersuisutta qallunaat naalakkersuisui oqaloqatigisariaqaraat pisariaqarpallu paasisitsiniaaffigalugit.

- Isumaqarpunga qallunaat naalakkersuisui taama periuseqassaguinik imminnut qiviaqqaartariaqartut, tassami ilisimavarput takusareerlugulu soorlu kukkukuuaqqat alligasuartitat, sapaartip akunnera sinnilaaginnarlugu uumatitat toqorarneqartarput, ilaatigut niaqoqaratillu ingerlaartut takuneqartarlutik. Tamakkua puisinniartarnerminngaanniit qallunaat namminneq nerisassaminnik uumatitsinerat naalliutsitsinerujussuuvoq sanilliullugu.

Ane Hansen isumaqarpoq Lene Espersenip oqaatsini utertittariaqarai.

-Utertittariaqarpai. Uumasuutitik qanoq namminneq pinerlugit qiviaqqaarlutik aatsaat qisuariartariaqaraluarput.

Inatsisartut Aalisarnermut Piniarnermullu Ataatsimiititaliaat sapaatip akunnerata tulliani ataatsimiissaaq, tassanilu Lene Espersenip saqqummiussinera oqaluuserineqassasoq, Ane Hansen aamma oqarpoq.