Ane Hansen: Arctic Green Foodip iliuusaa eqqumiippoq

Arctic Green Food ilisimatinneqartuaanarpoq aningaasanut inatsit naammassineqarpat, sapaatip akunnerani 50-imi kiffartuussinissamik isumaqatigiissutissaq isumaqatiginniutigineqarumaartoq.

Arctic Green Food sulisuminik soraarsitsinissamik suliffeqarfiillu matuneqarnissaanik nalunaaruteqarnera Ane Hansenimit eqqumiigineqarpoq. Arctic Green Food ilisimatinneqartuaannarnikuuvoq aningaasanut inatsit naammassineqartinnagu kiffartuussinissamut isumaqatigiissutit pillugit isumaqatiginniarnerit aallartinneqarsinnanngitsut. Arctic Green Food ilisimatinneqartuaannarnikuuvoq aningaasanut inatsit naammassineqareerpat uge 50-imi isumaqatiginniarnerit aallartikkumaartut. Arctic Green Food matusinissamik soraarsitsinissamilu nalunaaruteqarnera isumaqatigissuseqarusunnginnermik Ane Hansenip paasivaa. " Radiukkut isumaqatiginniarnerit isumaqatiginngilakka" Ane Hansen oqarpoq.

Arctic Green Food kiffartuussinermut isumaqatigiissuteqarnermi aningaasat sumut qanorlu atorneqarnerat pillugu Naalakkersuisunut nalunaaruteqartartussaavoq, tamannalu Naalakkersuisunit pingaartinneqartoq sukaterisoqartorlu Ane Hansen oqarpoq. Erseqqissarlugu naalakkersuisut paaserusukkaat pisortat aningaasaliissutaat erseqqissumik nalunaarutigisassagaat. Tapiissutit tassaassapput aalisartunut piniartunullu tutsinneqartut aamma takusinnaasariaqarparput taakkununnga atorneqartut, Ane Hansen oqarpoq

Arctic Green Foodip pisortaa Johanne Heilmann Petersen aamma siulersuisuni siulittaasoq Charles Kastberg matusinerit soraarsitsinerillu pillugit oqaaseqartinniaraluaratsigik iluatsingilarput.