Ane Hansen: Aalisartut piniartullu tunitsiveqartuarnissaat qulakkeerniarneqaleruttorpoq

- Oqaluttuassartaq taamaappoq, tamaangalu killeqartariaqarsimalluni. Taamaammat massakkut pisortaqarfipput suliaqartipparput aalisartut piniartullu tunitsivissaarutinnginniassammat nunaqarfinni illoqarfinnilu Arctic Green Foodeqarfiusuni tunitsivissanik periarfissanik allanik qinaasititsilluta, aammalu piareersaatitsilluta taassuma tungaanut, Aalisarnermut piniarnermullu naalakkersuisoq Ane Hansen taama oqarpoq.

Arctic Green Foodip akiliisinnaajunnaartutut nalunaarumalluni siulersuisunit qinnuteqaat pigisanik agguaassisarnermut eqqartuussivimmi suliarineqareersorlu, Arctic Green Food akiliisinnaajunnartutut pisortatigoortumik ullumi nalunaarutigineqarpoq.

Arctic Green Foodip tunisassiaasa pingaarnerit, tassa nipisat suaat aalisakkallu tarajortikkat, akii 2012-imi appariarujussuarput, maalaaruteqartoqarsimaneralu ilanngukkaanni tunisassiorfiup aningaasaqarniarneranik eqquingaatsiarsimalluni.

Suliffeqarfiup qerititsiviata pingaarnersap teknikkikkut ukioq manna januaarimi ajoquteqarnera pissutaalluni tunisassiorneq piffissami sivisuumi uninngasimavoq, akiligassanullu, soorlu sulisut feeriaqarnersiutissaat aalisartullu bonusisiassaat kinguaattoorfiusimallutik, soorlu aamma pisiassanik nalunaarsuineq kinguaattoorfiusimasoq, suliffeqarfiup akilisinnaassuseqarneranik eqquilluni.

Tunisassiorfiit illuutaannik attartortitsisoq, Ejendomsselskabet af 2007 A/S, Greenland Properties A/S-imik aamma taaguutilik, kommunit suleqatigalugit misissuivoq tunisineq qanoq ililluni ingerlaqqissinnaanersoq.

Misissuinerli aatsaat aallartimmat qaqugu naammassineqarsinnaanersoq, Aalisarnermut piniarnermullu naalakkersuisup oqaatigisinnaannginnerarpaa:

- Kommunit selskabillu tunisassiornermut tunngatillugu soqutigissaqartut saaffigineqarnikuupput. Taakkulu peqatigalugit qulakkeerniarneqassapput aalisartut piniartullu tunitsivissaqartuarnissaat aamma uanga isumaqarpunga periarfissaq una atorlugu nunatsinni nunaqavissut tunisassianik nunatta iluani aammalu tunisassianik kalaaliminerneersunik inerisaanissaminnut periarfissaq atorluarsinnaagaat, Aalisarnermut piniarnermullu naalakkersuisoq Ane Hansen oqarpoq.

Greenland Properties A/S marsip aallaqqaataanit atorfinittussamik pisortaanertaarsimasoq, Greenland Properties A/S-ip ullumi nalunaarutigaa.