Ane Hansen: Aalisartut ernumassutissaqanngillat

Imalu tunngavilersuivoq:

- Isumaqarpunga ernumanartorujussuartut tiguneqartariaqanngitsoq pissutigalugu, aalisarnermik inuussutissarsiuteqartut kattuffii qanimut suleqatigalugit tamanna suliaq ingerlanneqarniartoq oqaatigereeratsigut, Aalisarneq pillugu siunnersuisoqatigiiusimasut (Fiskeriråd) aamma aningaasarsiorneq pillugu siunnersuisoqatigiit siornatigut oqariartuutigisagaat kiisalu misissuisarnerit allat tunngavigineqarlutik 20 procentimik aalisartut ikilineqassasut siunniunneqartoq, Ane Hansen oqarpoq.

Ikilisaanissamilu taanikuusaat tassaapput:

- Aalisarnerminngaanniit namminneq illuarusuttut, kisiannili aalisarnermi inuussutissarsiornerminni akiitsorpassuaqalersimanertik pissutigalugu, taakkununnga pituttoqqanertik pissutigalugu alloriarnaveeqqasut siullertut isigineqassapput, Ane Hansen oqarpoq.

– Aappaattut angallatitoqqat illuartinneqarnissaminnut kissaateqaraluarlutik kisianni akissaqanngitsut, tapiiffigineqarlutik illuartinneqarsinnaasutut tikkuarnikuuagut. Kiisalu pingajuattut pisariillisaaneq aqqutigalugu akuersissutit ikilisarneqarsinnaanerat aqqutissaavoq, Ane Hansen oqarpoq.

Aningaasartuutissat ukiup tulliani qulaajarneqassasut, Aalisarnermut piniarnermut nunalerinermullu naalakkersuisoq Ane Hansen oqarpoq.

- Naatsorsuutigivara 2011 qaqilereqqissaarnissamut atussagipput aamma ukiunut tulliuttunut aningaasartuutaajumaartussat pillugit misissueqqissaarnissamut atorneqassaasoq, Naalakkersuisunut ilaasortaq Ane Hansen oqarpoq.