Ane Hansen aalisartunut: Qalerallit ungoorlugit nuunniarpisigit?

Siumut qinigassanngortitaanit siunnersuutigineqarpoq aqutsiveqarfinni tamarmi qaleralittassat amerlineqassasut. Siunnersuut qineqqusaartunit tapersersorneqarluarpoq.
Atassut siunnersuummut tapersersuivoq.

Partii nutaaq Partii Inuit siunnersuuteqarpoq avataasiortunut qaleralittassiissutigineqartut sinerissap qanittuani qaleralinniartartunut nuunneqassasut.

Qaleralittassat avataani pisassiissutigineqartut 14.000 tons-it sinerissap qanittuanut nuunnuneqartariaqartut Lars Mathæussen oqarpoq, sinerissap qanittuani aalisartut ingerlaqqittariaqarmata.

Siumut sinnerlugu qinigassanngortittup Karl Kristian Kruse-p qaleralittassat aqutsiveqarfinni tamani amerlineqarnissaannut takussutissaqartoq unnerpaa.

- Peqassutsip ilisimasallu ersersereerpaat aqutsiveqarfinni tamani  qaleralittassiissutigineqartartut ikippallaartut amerlineqarnissaanullu periarfissaqarluartoq, Karl Kristian Kruse oqarpoq.

Atassut naalakkersuisunut ilaasortanngortitaqalissaguni sinerissap qanittuani qaleralittassiisutigineqartartut amerlineqarnissaannut suleqataaniarpoq.

Qaleralinniartarnerup piniartunit aalisartunillu iluanaarutaasinnaanngorlugu aaqqissorneqarnissaanut Atassut suleqataaniartoq, Knud Fleischer oqarpoq.

Siunnersuutigineqartoq Pinngortitaleriffimmit paasiuminaatsinneqarpoq.

- Qalerallit avataani aalisagaasut avataani suffisarput tukertarlutilu taakkualu avataaniiginnartarput. Qalerallit alligaangamik kangerlunnut pulasarput, tassalu qalerallit immikkoortuupput marluk. Qaleraleqarfinnut allanut nuunneqarsinnaanngillat, sananeqaataat suffisarnerat tukertitsisarnerallu aallavigalugit qaleralittassiisoqartarmat, Pinngortitaleriffimi Aalisakkat qaleruallillu immikkoortortaqarfimmi pisortaq Helle Siegstad taama oqarpoq.

-  Qanoq iliortoqarsinnaanersoq paasisinnaanngilara aamma  siunnersuutigineqartoq paasisinnaanngilluinnarpara, sinerissap qanittuani qaleralittassiissutigineqartut amerlineqarniarpat imaluunniit aalisartut sinerissap qanittuaniittut avataani qaleralinniartalissanersut paasinngilara, Helle Siegstad taama oqarpoq.

Aalisarnermut Naalakkersuisuugallartoq Ane Hansen qinersisartut ataatsimiinneranni aperivoq qalerallit avataanniittut qanoq ilillutik sinerissap qanittuanut nuunneqarsinnaanersut

- Qanoq ilillusi nuunniarassigit ? Ungoorlugit? Imaluunniit qalunik qaloriarlugit sinerissap qanittuanut nuullugit ? Aalisarnermut naalakkersuisuugallartoq Ane Hansen aperivoq.

Inatsisartunut qinersinissamut Ilulissani qinersisartut ataatsimiinneranni ippassaq pisumi Aalisarnermut Naalakkersuisuugallartoq Ane Hansen kingulliulluni taama aperimmat, qinersisartunit avaallanneqarpoq.

Qinersisartut ataatsimiinnerat tulleq pissaaaq Sisimiut Timersortarfianni aqagu unnukkut.
Ataatsimiinneq KNR TV-kkut Radiokkulu toqqaannartumik aallakaatinneqassaaq.
Qinersisartut ataatsimiinerat aqagu unnukkut 19:30 kalalalisut ingerlanneqassaq. Qallunaatut ataatsimiinneq 21:30 aallartissalluni.