Ane Hansen: Aalisakkat qanoq naleqartiginersut ilisimaneqanngilaq

Allattoq Jaaku Lyberth
marsip 08-at 2007 17:47

Naalakkersuisut ukioq manna aalisarnermik inatsisissatut siunnersuut nutaaq saqqummiuppaat.

Allannguutissap siunertaraa ullumikkut inuussutissarsiutip inuiaqatigiinnut aningaasaqarnikkut tunniussakippallaarnerata allanngortinnissaa aalisakkammi immamiittut inuiaqatigiit tamarmik pigimmatigit.

Kialluunniit ullumikkut naluaa qanoq aalisakkat naleqartiginersut, tamannali IA-meersup Ane Hansen-ip inatsisartut aalajangiinerisigut sapaatip akunnerata tulliani pisussami allanngortikusuppaa.

Ane Hansen-i Aalisarnermut, Piniarnermut, Nunalerinermullu ataatsimiitsitaliami siulittaasuuvoq.

Paasissutissiisussaanermut siunertaavoq, Nunatsinni aalisakkat aningaasarsiutigineqarnerata atorluarneqarnissaa.

Ullumikkut aalisarnermik pisortaqarfik paasissutissanik piumasaqarsinnaanngilaq, pissutigalugu aalisarnermi inatsimmi paasissutissiisussaanermik peqanngimmat. Inuiaqatigiilli ilisimasariaqarpaat qanoq angallataatillit kilisaatinillu piginnittut aalisakkanik aningaasarsiortiginersut, taamatut isumaqarpoq; Ane Hansen

Namminermi oqartarput aalisarneq pissarsissutigerpiarneq ajorlugu, taamaattumillu aalisarnerminni akileraarutit akilerpiarneq ajorlugit. Qallunaalli statistikii (nalunaarusiai) misissorutsigit takusinnaavarput Danmarki nunarsuarmi aalisarluarnerpaat tallimaanni inissisimasoq. Taamannak pisoqarsinnaanavianngikkaluarpoq kalaallit aalisagartaat Danmarki aqqutigalugu tunineqartarsimanngikkaluarpata, taamatut oqarpoq; Ane Hansen

Suunuku paasissutissat Ane Hansen-ip piumagai ?

Aap, paaserusutai tassaapput; qanoq aalisakkanik pisaqartigisarnersut qanorlu pisatik aningaasarsissu-tigisartigineraat, soorlu Danmarkimi ingerlatseqatigiiffiit nunatsinnit pigineqartut aqqutigalugit nunanut allanut aalisakkanik tuniseqqikkaangata qanoq pissarsissutaatigisarnersoq paaserusunneqarmat. Pisassiissutit immaqa aamma tuniniarneqartarput tamakkua Ane Hansen-ip aamma paasisaqarfigerusuppai qanoq iluanaarutaatigisarnersut.

Kiisalu aamma paaserusuppaa kikkunuku piginneqatigiiffiit Danmarkimi aalisakkanik tuniniaaqqittartuusut. Aalisarnermimmi inuussutissarsiuteqarneq inunnit amerlanngittuinnarnit aqunneqarunarmat.

Ane Hansen-ip siunnersuutaa inatsisartuni aalajangiivigisassanngorluni pingasunngorpat siullermeerluni suliarineqassaaq.