Anders Fogh Rasmussenip kalaallit namminersulernissamik kissaateqarnerat ataqqivaa
Folketingimi ilaasortat Christiansborgimi ataatsimiinneri ullumi aallartsipput.
Ammaanermi ministeriuneq Anders Fogh Rasmussen nunatsinniit akisussaaffimmik annerusumik tiguserusunneq ataqqinerarlugu oqalugiaammini ilaatigut oqaaseqarpoq.
Allattoq Oline I. Olsen
oktobarip 02-at 2007 13:59
- Kalaallit Nunaata namminersornermut sukumiisumik ineriartornissaa naatsorsuutigaara, ministeriuneq Anders Fogh Rasmussen oqarpoq.
- Kalaallit nunaminnut avammullu saqqummertarnerminnut atatillugu akisussaaffeqarnerulerusullutik anguniagaqarnerat ataqqivara. Ineriartornerlu tamanna pissusissamisoorluinnarpoq, taama anguniagaqarneq Danmarkimi naalakkersuisut pimoorullugu tapersersorpaat, Anders Fogh Rasmussen oqarpoq.
Folketingip ataatsimiinneri aallarnerlugit
pisarnertut naalagiartoqaqqaarpoq, Folketingimilu siulittaasup tullia, Svend Auken, ataatsimiinnermik ammaasuuvoq.
Christian Mejdahl, siulittaasutut qinigaaqqippoq, taassumalu nunatsinni Landstingimi ilaasortat Savalimmiunilu Lagtingimi ilaasortat inussiarnersumik inuulluaqquai.
