Anders Fogh Rasmussen-ip isumaa tusarusunneqarpoq
Namminersorneq pillugu isumalioqatigiissitami ilaasortap Søren Espersen-ip , Dansk Folkeparti sinnerlugu ilaasortaatitaasup, nunatsinni oliamik nassaartoqarpat, isertitsissutaajumaartussat annertunersaannik Danmark pissarsissanngippat, danmark-ip nunatsinnut ataatsimoortumik tapiissutaannik allangortiteriniarmik oqaaseqarnera aallaavigalugu, Statministeri-p Anders Fogh Rasmussen-ip isumaa,
Ilulissani Inuit Ataqatigiiit immikkoortortaqarfiani siulittaasup Bendt Broberg Kristiansen-ip tusarusuppaa.
Namminersorneq pillugu isumalioqatigiissitap qanittumi isumaqatigiissutigaa, Aatsitassat aqqutigalugit isertitaasut 75 mill. kruunit qaangerlugit isertinneqartut affannik Naalagaaffiup tapiissutai ikilisinneqartassapput, tassani akit aningaarsiallu ineriartorneri tunngavigalugit.
Dansk Folkeparti isumaqarsimappat, isumaqartuassappallu Kalaallit Nunaanni nunamik pisuussutaanillu piginnittussaaneq qallunaat naalagaaffiata tigummiartariaqaraa, tamanna nunasiaateqarnermik ingerlatseqqiinniarnermik paasisariaqarpoq Ilulissani Inuit Ataqatigiit siulitaasuat Bendt Krisitisen allappoq nangillunilu Søren Espersen-ip ’nunasiaateqarniatut’ oqaaseqarnera Naalakkersuisut siulittaasuata Anders Fogh Rasmussen-ip qallunaat naalagaaffiat sinnerlugu akuerisinnaaneraa paaserusunnarpoq Ilulissani IAP siulittaasua aperaaq.
Søren Espersen-ip oqariartuutaa nalilerusuppara eqqarsartaatsikkut nunasiaateqarniarnertut’ (mental kolonialisme), tamannalu akuersaarneqarsinnaanngilluinnarpoq!
Qallunaat nunaanni naalakkersuisooqatigiit Dansk Folkeparti-p oqariartuutaa ’tusaanngitsuusaaginnartutut’ pissappassuk Kalaallit Nunaata qallunaallu nunaata akornanni pissutsit ilungersunartumik inississapput, tamannalu namminersulernissamut ataatsimiisitaliarsuup sulineranut minnerunngitsumillu qallunaat naalagaaffiata Kalaallit Nunaatalu akornanni akaareqatigiinnermut akornutaarataannavoq, Bendt Kristiansen Ilulissani Inuit Ataqatigiit siulittaasuat allappoq.
