Anders Fogh Rasmussen eqqissisimaqqusivoq

Danskit statsministeriat Anders Fogh Rasmussen ullumi nunatta nalunaaqutaa malillugu ataatsip qeqqanut tusagassiortunik katersortitsinermi tamat eqqissisimasumik pinissaannik inappai, oqarluni titartakkat pillugit taamarsuaq nunat musliimeqarfiusut iliornerat ingasattajaarnerusoq, allanut pinnani, taamaallaalli ingasattajaarnianut iluaqutaasoq.

Danmarkimi innuttaasut ajorusuutigaat Jyllands-Posten-ip Muuamaamik titartakkat saqqummiussai muamaamik upperisalinnut ajuallatsitserujussuarsimaneri, ilaatigut kangiani qiterlermi nunani sakkortusaarnerit inuluuginninnerillu kingunerimmatigik.

Ministeriunerup eqqaasitsissutigeqqippaa aviisip titartakkanik saqqummiussaqarnerminni ajuallatsitsisimanertik utoqqatsissutigereeraa.

Kingullertigut nunani araberisut oqaluffiusuni siaruarterneqarput oqaatsit Danmarkimut nikassaasut eqqunngitsullu, ilaatigut taaneqarsimalluni muamaakkormiut biibiliat Københavnimi ikuallanneqarsimasoq. Taamaattoqarsimagaaneq eqqortuunnginnerarpaa.

Pisut najummassimarsiartortillugit nunat siuttui arlallit maanna akuleruttut Fogh Rasmmussenip aamma oqaatigaa.

Danmarki illersoqatigiinnut NATOmut ilaasortaanera tunngavigalugu USA-p præsidentia George Bush Danmarki pisunut najummassimanartorsiorfiusunut ersoqatigiumavaa, erseqqissaatigalugu tamat oqaasissaqaqataanerat inuit pisinnaatitaaffigimmassuk avaqqunneqarsinnaanngitsoq.

Akaareqatigiinneq, oqaloqatigiinnerlu aqqutigalugit pisoq qaangerneqartariaqarnerarpaa.

Danskit nunanut allanut ministeriata Per Stig Møller-ip erseqqissarpaa Danmarkip inuit pisinnaatitaaffii ataqqisarigai.