Anders Fogh Rasmussen: Allakkat tupaallannarput
Tyrkiami kurderit borgmesteriisa 56-t, danskit ministeriunerannut, Anders Fogh Rasmussenimut, allassimanertik, ukiuni qulini parnaarussaassutigisinnaammassuk, ministeriunerup assut tupaallaassimaarutigaa.
Tyrkiami TV-qarfik, Roj TV, tamat oqartussaaqataanerannut pingaaruteqartoq, tamannalu tunngavigalugu Danmarkimi aallakaatitsisalernissaminut akuersissummik pisariaqartitsisoq, borgmesterinit allakkatigut decembarimi noqqaassutigineqarpoq.
- Inatsisinik unioqqutitsisimasutut unnerluutigineqarsimasut uannut allattarnerat assut tupaallaatigaara, pingaartumik EU-mi ilaasortanngorusulluni nunap suliniuteqartup innuttaasa taama allassimanerat tupaallaatigaara, Anders Fogh Rasmussen oqarpoq.
Tyrkiami ikinnerussuteqartut kurderit naalakkersuisunit nanertorneqaannassappata EU-mut ilaasortanngorniarnerup qanoq eqqorneqarsinnaanera ministeriunerup itisilerlugu oqaatigerusunngilaa.
- Ilungersunartorujussuuvoq. - Ilaasortanngorniaatigaluni EU-mi malittarisassanut akerliusumik Tyrkiap iliuuseqarsimanera akuerisinnaanngilarput, Anders Fogh Rasmussen oqarpoq.
Taama oqarneq Danmarkimi naalakkersuinermik suliaqartunit amerlanernit ilalersorneqarpoq.
Tyrkiami naalagaaffiup unnerluussisuutitaata nalunaarutigaa kurderit partiiat namminersulernissamik suliuneqartartoq inerteqqutaasorlu PKK sinnerlugu borgmesterit 56-t taakku tyrkiamiut TV-eqarfiutaata Danmarkimi aallakaatitsiinnarnissaa ministeriunermut noqqaassutigisimagaat.
