Anders Breivik misiliutaasumik iperagaaniarnermini akunnerni pingasuni oqalussinnaatitaasoq

Norgemiu Anders Breivik 2011-mi inunnik 77-inik toqutsisoq misiliutaasumik iperagaaniarpoq. Eqqartuussivimmi suliaq marlunngornermi aallartinneqassaaq.
Breivik suliaq imminut tunngasoq pillugu oqaaseqarnissamut marlunngornermi periarfissaqassaaq. Eqqartuussivup taassuma nassuiaataanik tusarnissamut akunnernik pingasunik periarfissiivoq. Assi © : Ole Berg-Rusten/NTB/Ritzau Scanpix
Allattoq Ritzau
januaarip 18-at 2022 11:11

Norgemioq inuppassuarnik toqoraanikoq Anders Behring Breivik ima ulorianartigiva Norgemi inuiaqatigiit taassuma parnaarussaaqqaneratigut illersorneqassallutik.

Apeqqut tamanna Norge eqqartuussivimmi ulluni tulliuttuni pingasuni suliarineqarnerani isummerfigineqartussaavoq, Breivik misiligutaasumik iperagaanissaminik qinnuteqarnerata kingorna.

- Taannaavoq eqqartuussivimi suliarineqartussaq, Breivikip illersuisua eqqartuussissuserisoq Øystein Storrik taama oqarpoq, taassuma eqqartuussinermi qitiusutut suliarineqartussaq pillugu oqaaseqarnianngilaq, suliap ullumi marlunngornermi aallartinnissaa sioqqullugu.

Brevik ukioq 2011-mi Oslomi naalakkersuisut allaffeqarfiinut qaartartumeerivoq kingornalu Socialdemokraatit inuusuttaasa qeqertami Uøyami katerisimaarfianni aallaammik saassussivoq, saassusinermi inuit 77-it toqutaapput.

Ukioq ataaseq qaangiummat, maanna 42-nik ukioqartoq Breivik ukiuni 21-ni parnaarussassanngorlugu pineqaatissinneqarpoq.

Norgemi inatsisit naapertorlugit ukiut qulit parnaarussaareeraanni misiligummik iperagaasoqarsinnaavoq.

Breivik misiligummik iperagaanissaminik qinnuteqaataa unnerluussisussaasunit aasaq itigartitsissutigineqarpoq. Piumasaqaataalu eqqartuussivinnut qulliunerusunut ingerlateqqinneqarpoq, Oslomilu eqqartuussiivimmi Telemark Tingretimi suliaq ullumi aallartinneqassalluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq