Andalap angajoqqaavi qatigattuut pillugit atuakkiortut

Aappariit Andalaaraq pillugu atuakkiornermi siornatigut suleqatigiissimapput. Atuakkiaminnilu nutaami uumasut silarsuaannik sammisaqarput.

Atuakkami 'Hvordan kamelen fik sine to pukler' qatigattooq pingasunik qatigalik Flemming oqaluttuarineqarpoq. Taanna ilaminit illaruaatigineqarnini pissutigalugu ungalusameeqatigisinnaanngilai. Ullulli ilaanni qatigattooq arnaviaq Sonja ataasiinnarmik qatigalik naapippaa, asannilersoorlunilu.

Atuakkallu meeqqanut marlunnit sisamanut ukiulinnut saaffiginnittup atuakkanit allanit allaanerussutigaa assaannarmik allagaalluni naqiterneqarsimagami. Naqiterisitsisarfimmit Fahrenheitimit saqqummersinneqarpoq danskisuinnarlu oqaasertaqarluni.

Nuka Godtfredsen aamma meeqqanut atuakkiortunut nersornaammut Almamut nunarsuarmi anginersaasumut innersuunneqarsimavoq. Nersornaat taanna Astrid Lindgren eqqaaniarlugu pilersinneqarsimavoq. Atuakkiortut katillugit 238-t nunanit 68-ineersut nersornaammut innersuunneqarsimapput, nersornaallu Sverigemi maajip naanerani juunilluunniit aallartinnerani tunniunneqassaaq. Nersornaat Sverigemiut aningaasaataannik 5 millionit koruuninik aningaasartaqartoq, atuakkiortumullu, assiliartassanik titartaasartumut oqaluttuartartumulluunniit ataatsimut arlalinnulluunniit tunniunneqartarpoq.