Anda Uldum: Siumukkut imminnut oqaloqatigiinnerusariaqarput
Naalakkersuisut qinnuteqaataata suliarinissaa aningaasaqarnermut ataatsimiititami ilaasortat tamarmik itingartissutigaat, taamaammat kommunenut qinersisoqalerpat partiinut tapiissuteqartoqassanngilaq.
-Siumukkut iluminni oqaloqatigiinnerusartuuppata taamatut pasinninnerit inuiaqatatigiit tusaasariaqassanngikkaluarpaat. Naalakkersuisut qinnuteqaataat 4. februaari nassiunneqartoq isummerfiginiaratigu isumaqatigiippugut. Tassa maanna qinersinissaq aalajangerneqareersoq. Piffissaq taamaalitillugu qinnuteqaatit taama ittut uagut suliarisussaanngilagut, Siumup qineqqusaartitaasa tamanna namminneq paasiniarsimasinnaangaluarpaat. Soorlu Inatsisartut Naalakkaersuisullu pillugit Inatsisartut inatsisaanni § 29-mi toqqaannartumik tamatumunngaqqissaaq tunngasoq. Taanna atuanngikkunikku Siumup aningaasaqarnermut ilaasortaatitaa sianerfigiinnarlugu piviusut suunersut paasisimasinnaangaluarpaat, Anda Uldum knr.gl-imut nassuiaavoq.
Inatsisartut Naalakkersuisullu pillugit Inatsisartut inatsisaanni § 29-imi allassimavoq, Naalakkersuisuungallartut atorfimminnut atatillugu pingaarutillit kisiisa iliuuseqarfigisinnaagaat. Tassunga uiggiullugu allassimavoq, qinersisoqalernerani qinersisoqarnerataluunniit nalaani qinersinernut attuumassutilinnik Naalakkersuisut suliniuteqartassanngitsut. Taamatut aalajangersaanikkut ilaatigut siunertaavoq, qineqqusaarnermut tapiissutaasinnaasut atorlugit Naalakkersut naammaginanngitsumik imminnut iluaquserniarsinnaanerat pinngitsoortitsiniaaneq.
Aalajangersakkat assingusut aamma Inatsisartunut Aningaasaqarnermjut ataatsimiititamullu atuutsinneqarput. Ataatsimiititap suleriusissaanut taamaammat ilaatinneqarput aalajangersakkat qinersisoqarnissaanik aalajangiisoqareertillugu immikkut tapiissutinut tunngasut suliassat killilersorneri. Aalajangersagaq naapertorlugu tapiissutaasut pisariaqarluinnartuussapput, politikkikkut inissisimanermut attuumassuteqassanngillat kiisalu Inatsisartut aningaasanut tunngasunik iliuuseqartariaqavissussallutik. Aalajangersakkap siunertaa taamaammat unioqqutissinnaanngilarput.
