Anda Uldum: Meeqqanut ombudsmandeqalissava?

Taamaanngippat paarlattuanik nassuiaqquneqarpoq meeqqanut inuusuttunullu suliniutinik Naalakkersuisut sunik aallartitsiniarnersut.

Anda Uldumip apeqquteqaatini tunngavilersorlugu allappoq, innuttaasut nuna tamakkerlugu meeqqat inuusuttullu atugaat, oqaatsit kusanartorsuit atorlugit oqallisigigaat, annerusumilli iliuuseqartoqarani.

- Meeqqat ombudsmandeqarfiata suliassaanut pingaarnernut ilaassagaluarpoq, innuttaasunut Naalakkersuisunullu attaveqaataanissaq. Allatut oqaatigalugu, meeqqanut ombudsmandi Naalakkersuisunut, innuttaasunut, kommuninut sullivinnullu toqqaannartumik attaveqartariaqarpoq, Anda Uldum allappoq.

Taanna isumaqarpoq, meeqqanut ombudsmandi meeqqat inuusuttullu atugaannut malinnaassagaluartoq, ilisimasanik katersilluni, minnerunngitsumillu meeqqat, inuusuttut ilaqutaasalu atugaat pillugit oqallissaarisuussagaluartoq.

Anda Uldumip siunertaannginnerarpaa, meeqqanut ombudsmandeqarfiup nakkutilliisuunissaa imaluunniit assingusinnaasumik pisinnaatitaaffeqarnissaa, soorlu naammagittaalliuutinik suliaqartarluni imaluunniit allaffissornikkut aalajangiisarluni, taamatut periuseqartoqassappat allaffissornermi ingerlatseriaatsit pioreersut qulangerneqassammata.

Meeqqanut ombudsmandeqarfik allaffimmiussaa ilanngullugu ukiumut katillugit millionit pingasut missaannik akeqartassasoq, Demokraatit naliliipput.