'Anda Uldum marloqiusamik oqaqarpoq'
Anda Uldum Demokraatineersoq marloqiusamik oqaqarluni oqalunnerarlugu Siumumiit Finn Karlsenip Aleqa Hammondillu ullumi pisuutippaat.
Aningaasaqarnermut ataatsimiititaliamit ilisimatitsinerit naapertorlugit, Jens B. Frederiksenip qinnuteqaataanut Aningaasaqarnermut ataatsimiititaliami ilaasortat isumaqatigiillutik naaggaarput. Tassa imaappoq, Anda Uldum aamma naaggaarsimasoq.
Demokraatinulli ilaasortaq ippassaq unnukkut radioaviisimi oqarpoq, Jens B. Frederiksenip qinnuteqaataa nammineq tapersersorini, Aningaasaqarnermullu ataatsimiititaliap naaggaarnera ajuusaarutigigini.
Anda Uldumilu Radioaviisimut ullumi uppernarsaavoq, paasissutissanik arlalinnik apeqquteqareerluni, qinnuteqaat tapersersimagini, kisiannili Siumukkut Inuit Ataqatigiillu ataatsimoorlutik Jens B. Frederiksenip qinnuteqaataanut naaggaarmata nammineq tapersiinini atorunnaarsinneqartoq.
Finn Karlsenip Aleqa Hammondillu ilisimatitsissutigaat, qinnuteqaammut itigartitsinerminnut tunngaviusoq, aningaasat aallerfiginiarneqartut tassaammata nunaqarfinnit isorliunerusuniillu sanaartornissamut atugassat, tamannalu Siumup akuersaarsinnaanngilluinnaraa.
- Assartuineq pillugu Isumalioqatigiissitap isumaliutissiissutaa pillugu oqallittoqarnissaa Siumup aamma utaqqimaarumavaa, Siumukkunnut ilaasortat taakku marluk allapput.
Aningaasaqarnermut ataatsimiititaliap siulittaasua, Inuit Ataqatigiinneersoq, Olga P. Berthelsen, Radioaviisimit ullumi oqaaseqartinniaraluarparput, paasiniarlugu Aningaasaqarnermut ataatsimiititaliami ilaasortat isumaqatigiillutik umiarsualiviliornissamut naaggaarsimanersut imaluunniit naamik, Olga P. Berthelsenili ullumikkut pissarsiarisinnaasimanngilarput.
