Anda Uldum: Atuarfik pisuutikkunnaarlugu angajoqqaatut akisussaaffik tiguneqarli
- Meeqqat angusarluppallaarnerarlugit imaluunnit meeqqat atuarfii ingerlalluanngitsut oqallinnerit ukiuni kingullerni imarisarpaat. Meeqqat angusaat ajunngillat ingerlaqqinniartarnerannuna ajornartorsiutaasoq.Tassunga killikkaangat meeqqat atuarfiat pisuutinneqalersarpoq. Pisuutitsiniartarnerit tassunga killittariaqalerput oqallinnerillu kusanarnerusumik ingerlanneqartariaqalerput immitsinnullu kaammattoqatiginnerulerluta, inuttut ataasiakkaatut angajoqqaatullu akisussaaffimmik tigusisariaqalerpugut, Anda Uldum nassuiaavoq.
Kommuneqarfik Sermersuumi meeqqat atuarfiannik naammassinnittartut ilinniaqqiffiusunullu ingerlaqqittartut 2010-mi 53 procentiupput, 2012-imilu 44 procentiullutik. Ilinnialersartut amerliartoraluartut ilinniaqqinngitsoortartut suli amerlavallaarujussuartut Anda Uldum isumaqarpoq.
- Suli amerlanerit ingerlaannaq ilinnialernissaannut kaammattortariaqarpavut, pitsaasumik inuuneqaleqqullugit kiisalu suliffittaarnissaannut inuunermilu akisussaaffimmik tigusinissaannut kaammattorlugit. Allanik isumalluuteqaannarsinnaanngilagut. Angajoqqaat akisussaaffitsik tigusariaqarpaat meeqqaminnillu kaammattuillutik, oqarfigalugillu: ilinnialersinnaavutit, sapinngilat upperaatsigit aamma ikiorumaarpatsigit.
Anda Uldum Kommuneqarfik Sermersuumi kommunalbestyrelsemi meeqqanut, ilaqutariinnut atuarfeqarnermullu ataatsimiititaliami siulittaasuuvoq, ukioq mannalu atuarfeqarnerup tungaatigut 10 million koruunit tungaanut sipaarutigaat, taakkununnga ilaapput ilinniartitsisut ilinniaqqittarnerannut tunngasut. Akisussaaffimmik allamut tunniussiinnarnerunngila?
- Pikkorissarnerit ilinniaqqinnerillu atuartitsinissamut sunniuteqarluarnersut takorusullugu, pisariaqartitavut naapertorlugit pikkorissaasoqarnersoq imaluunnit inuit ataasiakkaat pisariaqartitaat kisimik aallaavigalugit pikkorissaasoqarnersoq takorusullutigu sipaarniarfigaavut. Aningaasat silatusaarnerusumik atortariaqarpavut aamma kommunerput naassaanngitsumik aningaasaateqanngimmat allatut ajornaqaaq, Anda Uldum erseqqissaavoq.
