Assi: Nanoq.gl

Aningaasanut inatsit 2015 Anda Uldum: Ataatsimoorluta qajaq makitissavarput

Aningaasaqarnermut Naalakkersuisup 2015-imut aningaasanut inatsisissaq saqqummiuppaa, taallugu "Ataatsimoorluta qajaq makitissavarput".

Nunatta aningaasaqarnikkut unammilligassai amerlasuut aallaavigineqarput - maannalu aamma Pituffimmi kiffartuussinissamik isumaqatigiissut annaaneqarmat, raajartassat ikilinerat, utoqqaat amerliartornerat, tamatumalu kinguneranik akileraartarnermit isertitat ikinnerulermata, iliuuseqarnissaq pisariaqarpoq, Andreas Uldum Naalakkersuisut sinnerlugit oqarpoq.

- Tamanna tunuliaqutaralugu Naalakkersuisut aningaasanut inatsimmik sukangasuumik saqqummiussaqarput, aningaasaqarnitta inissisimaneranik ersersitsisumik. Aammali aningaasaqarnermut inatsisissatut siunnersuut pitsaasunik anguniagaqarpoq, siunnersuut ajornartorsiutip aaqqinnissaanut periarfissanik assigiinngitsorpassuarnik imaqarmat, Andreas Uldum tusagassiuutinut nalunaarummi allappoq.

Namminersorlutik Oqartussat ukiut tamaasa sipaaruteqartassapput

2018-imi naatsorsuutit oqimaaqatigiilernissaat Naalakkersuisut anguniarpaat. Tamatumali tungaanut Namminersorlutik Oqartussani allaffissornikkut ingerlatsinikkullu ataatsimut ukiut tamaasa 50 millionit koruuninik sipaaruteqarfissanik nassaartassapput, Ukiormannalu 85 millionit koruuninik amigartoortoqarnissaa Naalakkersuisut naatsorsuutigaat.

Aningaasartuutissanut inatsimmut siunnersuut tamakkiisoq uani atuaruk.

- Akerlia amiilaarnartuuvoq. Maannakkut iliuuseqanngikkutta suli akiligassaq annerusoq paarilissavarput. Tamannalu isumaqassaaq ukiuni tulliuttuni suli sipaarnerulertariaqarnermik, ajornerusumillu inuiaqatigiinni sanngiinnernut kinguneqarsinnaasumik. Tamannalu akuerineqarsinnaanngilaq. Taamaammat pisariaqarluinnarpoq maannakkut iliuuseqarnissarput.

Anda Uldum, Aningaasaqarnermut Aatsitassanullu Naalakkersuisoq  taama oqarpoq, nuannaarlunilu oqaatigaa, maannakkut iliuuseqarutta, siunissami aningaasaqarnikkut sunniutissat utaqqisut avaqqussinnaagivut. Nangipporlu:

- Siunnersuummi ukiumi matumani 85 million koruunit pallillugit amigartoornissaq ilimagineqarpoq, aningaasanut inatsisissatut siunnersuummi tamanna tunngavigineqarpoq.

2018-imi oqimaaqatigiisitsinissaq

2018-imi oqimaaqatigiisitsinissaq isumannaarniarlugu sipaaruteqarnissat ingerlatsinikkullu suliniutit nutaat Naalakkersuisut siunnersuutigaat. Tulliullugulu sakkunik eqqussissaagut, pisortat aningaasaataannik aqutsilluarsinnaanerusunik. Assersuutaasinnaavoq missingersuutinut inatsimmik nutarterineq, Naalakkersuisut kommunillu aningaasartuutaannik killiliinermik nassataqartussaq.

Aningaasaqarnermullu inatsisissatut siunnersuut sipaaruteqarfissaannarnik saqqummiussinngilaq, ineriartornermilli sulinermillu siuarsaasussanik aningaasaliinissanik arlalinnik imaqarpoq. Suliniutit siumut sammisut ilisarnaatigaat, inuussutissarsiornerup iluani killiliussat siuarsartussaagamigit. Assersuutigineqarsinnaavoq umiarsuakkut takornarianut akitsuutip annikillisinnera. Assersuut alla sanaartornermi aningaasaliinerit annertuumik qitiutinneqarnerat, uuma ataani suliffeqarfiit, inissiat, mittarfiillu. Taaneqartup kingulliup illoqarfinni sanasut suliassaat annertusissavaa. 

Tamatta suleqatigiittariaqarpugut

Anguniakkagut angussagutsigit tamatta suleqatigiittariaqarpugut. Naalakkersuisut kisimiillutik suliassat suliarisinnaanngilaat. Kikkut tamarmik taperseeqataasariaqarput. Taamaammat Naalakkersuisut suliaq kivinniarlugu tamat suleqatiginiarlugit aallarniiniarpoq, partiillu tamarmik suleqataanissamut qaaqquneqassapput. Isumaqatiginninniarnerit tunngavigaat siunnersuummi anguniakkat annertuut. Tamannarpiaq pissutigalugu 2015-imut Aningaasanut inatsisissatut siunnersuut ”Ataatsimoorluta qajaq makisissavarput”-mik taavarput. 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat