Anaanaq inuusuttoq: Inuusunnersi atorluaqqaarsiuk
Meerartaajaarneq nuanneraluaqaluni aamma illuatungeqarpoq, taama 19-inik ukioqarluni ukioq manna marsip 14-ianni panissaartoq Sisimiormiu Sikkersoq Olsen oqaluttuarpoq. Ulloqeqqanut radioaviisimi saqqummiupparput nunatsinni inuusuttuaqqat nunani allani inuusuttuaqqanut naleqqiullutik kinguaassiuutitigut atoqatigiittalijaarnerusarnerat misissuinikkut paasineqartoq, tamannalu ilaatigut meerataajaartarnermik kinguneqartoq. Sikkerneq Olsen meerartaarnissi pilersaarutigisimanngikkini oqaluttuarpoq:
- Pilersaarutaanngitsumik naartulernera tarnikkut piareersimaffigisimanngilara, kisianni ajornikuunngilaq naartuneralu aamma nuannersumik ingerlavoq.
Aappaqarluni naartulerpoq, meerartaarnermilli kingorna sapaatip akunnera qaangiummat aappanilu qimassimapput. Meerartaarnermi kingorna qaammat siulleq assut pikkunanaarsimanerarpaa.
- Kisianni ajunngilaq pikkunaqalunili. Meerannguup atorfissaqartikkaanga malugalugu assut pikkunaqaaq, ingammik ulloq unnuarlu akunnerit pingasukkaarlugit pinngitsoorsinnaanga itertarnera pikkunarnikooqaaq, assulli nuannerluni.
Sikkersoq Olsenip naartulerami niuernermik ilinniarfimmi ilinniarnini unitsikkallartariaqarsimavaa, meerartaarnermullu atatillugu sulinngiffeqareeruni aappaagu upernaakkut nanginniarlugu pilersaaruteqarpoq. Unittoortutut misigisimanngilaq:
-Imaanngilaq anaananngoraanni inuusuttuuneq tassunga killeqartoq. Uanga naartulerama ataasiaannarlungaluunniit fiistertarnerit maqaasinikuunngilakka, soorunami nikallungaffinni maqaasisarsinnaagaluarpakka, kiffaanngissuseqarluni kammalaatit ilagalugit aneriasaarluni fiisteriasaartarnerit, qujanartumilli annertunerusumik maqaasinikuunngilakka.
Sikkersoq Olsenip inuusuttoqatini siunnersuutissaqarfigai:
- Massakkut uanga nammineq meerartaarsimanera pissutigalugu oqarusunngilanga inuusukkamik meerartaassanngitsut. Meerartaarluni nuanneraluaqaaq kisiannili siunnersussavakka inuusunnertik atorluaqqaassagaat.
Paarisa atoqatigiinnermi illersuutit pillugit paasissutissiisutitut atuagassannguanik ilinniutinillu ukiut marluk matuma siorna sinerissamut nassiussuivoq. Tassunga atatillugu sinerissami napparsimmaviit arfineq pingasut suleqatigalugit inuusuttunut aamma qaammarsaasoqarsimasoq, Paarisap pisortaa Bodil Karlshøj Poulsen ilisimatitsivoq.
