Anaanaq inuusuttoq: Aliatsarujussuartarneq nipangiutiinnagaavoq

Sikkersoq Andersen ernertaarami qaammatini siullerni aliatsarujussuaqqavoq. Nunatsinni erninermut atatillugu aliatsarujussuaqqasut ukiumut ikittuinnaat paasineqartartut taanna ilagaat.
Allattoq Salome Hansen
marsip 25-at 2011 10:45

Nunatsinni naartunermi erninerulluunniit kingorna aliatsarujussuarnermik nalaataqartartut ernisunit procentimik ataatsip missaaniittartut nunani tamalaani quleriaammik amerlanerupput. Taama nalaataqarsimasut ilaat Sikkersoq Andersen 24-nik ukiulik KNR-imit oqaloqatigaarput.

-Nakkaqqarujussuartalerpunga, aliasorujussuarlunga matoqqasorujussuanngorlungalu, Sikkersoq Andersen oqarpoq.

Sikkersoq Andersen ukiup aappaata qeqqata matuma siorna ernertaarpoq, erninermilu kingorna aliatsarujussuartarnermik nanertisimanermillu misigilersimalluni.

- Unnukkut itertalerpunga takusuusisalerlungalu ernerma niaquani aasiappassuaqartoq, tamannali qujanartumik qaangiuppoq, Sikkersoq Andersen oqarpoq.

Erninermi kingorna nuannaassaqannginneq pilluartutullu misigisimannginneq annertuumik nanertisimaassutigisimavai.

-Erninerma kingorna qaammatit marluk qaangiuttut ernera sinittoq isigalugu imminut tupatsillunga pilluaammerujussuarpunga, pilluaammingaarama manittortuinnanngorlunga qiavunga. Qujanartumillu tamanna misigaara, Sikkersoq oqaluttuarpoq.

Naartunerup nalaani erninerulluunniit kingorna aliatsarujussuartarnerup inuiaqatigiinni takussaanngiinnera oqaluuserineqarpallaannginneranik tunngaveqarsinnaasoq aliatsarujussuarnermik nalaataqarsimasoq Sikkersoq Andersen isumaqarpoq.
Sikkersup taama misigisaqarnermini matoqqanerujussuaq avatangiisaanut inuuneranullu annertuumik sunniuteqarsimaqaaq.

-Inoqatinnut matoqqasorujussuanngorpunga, qanigisarigaluarlugit imminut mattussimagaluarpunga, Sikkersoq oqarpoq.

Taamatut misigisaqarnermini ilaquttaminik oqaloqateqartarnini tapersersorluarneqarsimaninilu qujamasuutigeqai. Pingaartumik aapparmi qasuttuilluni paasinnilluarlunilu tapersersuilluarsimanera.

Sikkersoq aliatsarujussuarnermik atugaqarnini qaangerusullugu Dronning Ingridip Napparsimmavissuanut saaffiginnissimavoq, nakorsamillu qinigassinneqarsimavoq tarnit pissusaannik ilisimasalimmik namminersortumik nammineerluni ujaaserusunnersoq iisartakkanilluunniit misileerusunnersoq. Nakorsamiillu oqaloqateqarnermini paasitinneqarsimavoq akeqanngitsumik oqaloqatiginnittalissaguni ukioq ataaseq marlulluunniit utaqqisariaqassasoq, utaqqisut amerlaneri pissutigalugit.

- Taamani ima nakkaqqasimatigaanga allaat isartagartorusussimallunga, qasuvungami nakkaqqanera qatsullugu iliuuseqarfigerusullugulu, Sikkersoq oqarpoq.

Sikkersoq ullumikkut inissisimanerminnik erninermilu kingorna aliatsarujussuarsimanerminik qaangiiniarnini uteriiffigaa. Matoqqarujussuarsimanerminit ullumikkut ima allanngorsimatigaaq allaat nammineerluni saqqummersinnaalersimalluni.

Sikkersoq ullumikkut qiimanerulerlunilu ammarnerusimaqaaq unalu sapaatip akunnera Facebookikkut quppernermik sanasimavoq, tassani anguniarlugu taamatut nalaataqartartut ataatsimut ikorfartoqatigiiffissaannik peqarnissaa angorusullugu. Isumaqarporlu taamatut nalaataqarsimasut toqqorternnagu ikiortissanik ujaaseqqullugit, taamaalilluni ajunnginnerusoq anguneqarsinnaammat.