Anaanap peqatigiiffik ujartorpaa
Paamiuni peqatigiiffiup Kialaap assigisaanik illoqarfinni allani peqalernissaanik anaanaasumit ujartorneqarpoq.
- Nuannaassagaluaqaanga angajoqqaat allat naapeqatigisalersinnaassagaluarukkit, misigissutsit eqqartornerisigut ikorfartoqatigiissinnaassagaluaratta tusaaneqarlutalu. Kinguaassiutitigut atornerlunneqarsimasumut anaanaasoq oqarpoq, ujartuininilu ima nassuiarpaa.
- Ernera kamaleraagat qanoq iliuusissara nalulertarpara, nalunngilara atornerlunneqarnikuunini pillugu kamaqartaqisoq, ikioriarfissaarullugu kamaqatigiinnartarpara. Kinguaassiutitigut innarlerneqarsimasumut anaanaasoq taama oqarpoq, anaanaasup qitornani illersorniarlugu kinaassutsiminik isertuussivoq.
Paamiuni kinguaassiutitigut innarliisarneq akiorniarlugu peqatigiiffimmik Kialaamik pilersitseqataasoq, Isak Thorsenip peqatigiiffiliorusuttut kaammattorpai, Tasiortami normu 141-mi peqatigiiffiliornermi suleqatigiinnissamut ilitsersuussisinnaasunut attaveqaqqullugit.
