Anaananngujaartarneq kinguaariinnut ingerlaqqittarpoq

Nivissat inuusuttuaqqat 15-t ataallugit ukiullit anaananngortarnerat nunatsinni takornartaanngilaq. Tamannalu ajornartorsiutaavoq angisooq tassami taama inuusutsigalutik anaananngornissaminnut meeqqamillu paarsinissaminnut piareersimasanngimmata, tamannalu meeqqamut paarsinerlunnermik kinguneqartarpoq meeqqamut anaanaasumullu ilaatigut alianartumik kinguneqarsinnaasartoq, taama oqarpoq juumooq aammalu anaananngujaartartut suliniarfigineqarnerannut ataqatigiissaarisoq Birgit Hansen.
septembarip 10-at 2008 12:24

Nivissat 19-t ataallugit ukiullit 2006-imi meerartaarsimasut 128-inik amerlassuseqarput, ukiunilu siuliini kisitsit tamanna suli qaffasinneruvoq. Inuusuppallaarluni meerartaarneq ajornartorsiutinik pilersitsisarpoq, soorluttaaq assersuutigineqarsinnaasoq Ilulissani anaanaq inuusuttoq qitornaminik ataatsimik ukiulimmik qanittukkut toqutsinera.

- Arnat inuusuttut naartusut arlaqaqisut sullippavut, suli inuusulluni anaananngortarneq Kalaallit Nunaanni ajornartorsiutaavoq tassami meeqqap qanoq paarilluarneqarnissaanut tunngavissat piareersimaffigisanngilaat, namminneerlutik inigisaqarneq ajorput, ilinniagaqanngillat amerlaqisullu meeqqat atuarfialluunniit naammassisimaneq ajorpaat, aammalu meeqqap iluamik isumassorneqarnissaanik naammattumik tunniussaqarnissaminnik piareersimasaratik, taama oqarpoq Juumooq taamalu anaananngujaartartut suliniarfigineqarnerannut ataqatigiissaarisoq Birgit Hansen.

Taanna tunngavilersuivoq nivissat inuusuttut meerartaarnissartik namminneerlutik qinigarisanngikkaat nalaataqartoornerannilli tamanna aallaaveqartartoq pissutiginerullugu imminnut paarinissartik ilikkarsimannginnamikku taamalu imminnut paarisinnaanngikkunik aamma meeraaqqamik paarsinissaminnut nukissaqartaratik, taannaasorlu ajornartorsiutip qitinga.

Birgit Hansen nangilluni tunngavilersuivoq anaananngujaartut amerlanerit angajoqqaaminni ilaatigut imigassamik atornerluiffiusumi angerlarsimaffeqartuugajuttut, angerlarsimaffillu taama ittoq taannaasoq kinguaariit ajornartorsiutinik kingornuttaqattaakkanik aallaaveqartuusoq meeqqanillu paarsillaqqinnerpaaffiunngitsoq ilaatigut nakuuserfiusoq.

- Suli ikiuutissat annerusut pisariaqartinneqarput, tassami taama peroriartorsimanerup kingunerisarpaa imminornerit amerlanerujussui, sianiutitigut napparsimanerit, paarinerluinerit, ilinniagaqannginnerit, tamakku tamarmik inuiaqatigiinni ersipput, Birgit Hansen naggasiivoq.