Anaananngorlaat hash-imik atornerluisuusut amerliartuinnarput

Anaananngorlaat SANAmi meerartaartut, hashimik atuinerluisuusut amerliartuinnarput, inoorlaallu amerlanerujartuinnartut kingunerlutitsillutik inunngortarput. Ernisussiortoq tamatuminnga suliaqartoq, meeraaqqanullu nakorsaaneq taama oqaluttuarput. Taakkulu misigisaat kisitsisinit uppernarsarneqarput.

Dronning Ingridip napparsimavissuani  inunngortut, novemberip qaammataata qeqqanit, ullumikkumut 53-iupput. Taakkunannga arfineq pingasut anaanaat ikiaroornartumik hashimik atuisuupput, tassalu inunngortut 15 procentii.

- Maannakkorpiaq amerliartoqisut misigaarput, Inga Hjuler Nuummi napparsimavissuarmi meeqqanut nakorsaaneq oqarpoq.

Naartusut hashimik atuisut amerliartortut,  SANA-mi ernisussiortup Margrethe Kruse Jensenip aamma malugilluarpaa. Taanna ernisussiornermi siusissukkut iliuuseqartartutut ukiut kingulliit tallimat sulivoq, tassalu naartusut ulorianartorsiortut aallutaralugit.

Piffissami kingullermi naartusut, ikiaroornartumik hash-imik atuisut amerliartorput. Ajornartorsiullu malunnarsisimammat naartusut hashimik atuinerluisut amerliartortut, SANAmi sulisut septembarimi nalunaarsuisalerput.

Anaananngorlaat hashimik atuisuunerat akuttunngitsumik ersertarpoq, naalungiarsuit kingunerlutitsillutik ingunngorerisigut. Margrethe Kruse Jensenillu taamaattut amerlanerujartuinnartut naammattoortarpai.

Taassuma oqaluttuaraa ilisarnartumik qiaannavittartut sajukulaartarlututillu.

Naartusut ernisussiortunut ornigunneranni, naartusut aaangajaarniutinik atornerluisuunerat ernisussiortunit naammattoorneqartarpoq.

Meeqqat nakorsaanerata Inga Hjulerip Margrethe Kruse Jensenillu oqaatigaat, meeqqat inoorlaat ikiaroornartumik hashimik kingunerlutitsisarnerat inersimasut ikiaroornartumik perususseqartarnerannut assingusoq.

Imigassamik atuinerup annertunera nunatsinni ajornartorsiutaasoq ilisimaneqaraluartoq, SANA-p ernisarfiani hash-imik atuisut amerlanerat malunnarpoq.

Imigassamik atuisoqartillugu  tamanna malugineqarsinnaasarpoq, ikiaroornartumilli hashimik atuisoqartillugu tamanna malugineqarsinnaanani. Naartusut ikiaroornartumik hashimik atuisut ernisussiortunit oqaloqatigineqarnerminni, haship naartumut ulorianaataannik nassuiaanneqartarput, tamarmilli iluatsinneq ajortut ernisussiortup Margrethe Kruse Jensenip oqaatigaa.

Ikiaroornartoq hash pinngitsoorsinnaannginnamikku atuisuunertik unitsinneq ajorlugu, naartusut oqarsinnaasarput. Ilaat avatangiisimik qanigisamik, ikinngutimillu atuisuunermik unitsitsineq ajortut, Margrethe Kruse Jensenip oqaatigaa.

- Meeraq inunngoraangat pissutsit piviusut takuleraangaamikkit tupattarput, kisiannilu kingusinaartarlutik, tamannalu takornartaanngilaq, Nuummi  napparsimavissuarmi SANA-mi ernisussiortoq oqarpoq.

Anaananngortartut tamatuminnga ilisimasakinnerat, ajornartorsiuterujussuartut Inga Hjulerip eqqaavaa.

- Maluginiagaqartarpunga, ananaat inuusuttut ilisimaqqissarneq ajoraat naalungiarsunnut qanoq ulorianartigisinnaasoq. Naalungiarsuit naartuutillutik sunnerneqarsinnaasut, aamma ilisimaqqissaarneq ajorpaat. Haship ilangaatsiarsua milutitsitsisup immuanut pisarmat, taamaalillunilu miluttumut ajoqusiisinnaalluni, Inga Hjuler Sanami meeqqanut nakorsaaneq oqarpoq.

Naartusut ikiaroornartumik atuisut sinerissamiittut, Nuummi SANA-mi erniartortinneqartarput, sinerissami napparsimavinni ernisussiortumik nakorsanillu immikkut pisinnaasalinnik sulisoqanngimmat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat