Anaanaasoq: Paninnik arsaarsinga
Ungaaq Poulsen 1971-imi ukiakkut inunngorpoq. Uersagaavoq. Angajoqqaavisalu tamagimmik pigerusunngilaat. Aanakkuisalu nangaasunnguamik tiguaat. Alliartorneranilu asanninnertaqanngilaq. Uersagaavormi. Taavalu pisortanit isumagineqalerpoq ilaqutariinnilu paaqqutarineqalerluni. Meeraanermini inuusuttuunerminilu ilaqutariinni assigiinngitsuni sisamani paaqqutarineqarpoq. Tamakkuinnaanngillalli. Meeraatillunimi aamma kinguaassiutimigut atornerlunneqarsimavoq.
Maanna anaanaavoq kisimiittoq, panini aqqanilinnik ukiulik najortigalugu, qitornaqarlunilu angajullermik. Taanna aanaakkumini najugaqartoq. Nukarliliaa inunngutsiaannaarluni toquvoq.
Panini najortigisani pillugu ukiorpassuarni nakuuniaraluarpoq, Ungaaq Poulsenimullu maanna suna tamarmi taartuinnaavoq.
Ukioq 2006 tassaanerarpaa, imminerminut nakkariartupiloorfik. Taamaniuvormi Sisimiut Kommunerisimasaata panianik arsaarinniffia. Panini taanna maanna najortigeqqilernikuuaa.
Taamani aapparisaata arnaq oqaluttuartitarput kommunimut oqaatilliissutigisimavaa, oqarluni aapparmi meeqqatik persuttartarai. Ungaaq Poulsenillu oqarneratut sallu taamani ajugaavoq.
Panini ajornartorsiortitsinngitsoq oqaluttuaraa. Ungaaq Poulseniuna imminut ajornartorsiutigisoq, inuuneq aqussinnaannginnamiuk, taamaammallu panini pisortanit tiguneqaqqugaluarpaa. Taamalu inissisimanini panimminut sapinngisaminik nassuiaatigisarpaa, Ungaaq Poulsenilu misigisimavoq, paniata inissisimanertik paasisaraa, naak aamma arnami taama oqalunnera imminerminut artornaraluartoq.
- Soorunami tujormisukassaavoq.
Ungaaq Poulsen imigassartortuuvoq hashimillu ikiaroortarluni. Soorlu oqartoq; taama atornerluilluni ilumini eqqissiniartartoq.
Taavali aamma kommunimit naapertuinngitsumik pineqartutut misigeqqippoq. Tassa Utoqqaat illuaniit 2012-imi soraarsitaavoq, nammineq oqarneratut eqqunngitsumik tunngaveqartumik, toqutsiniartutut pisuutinneqarluni.
- Aamma tassa sallu, arnaq oqarpoq.
Suliani taakkunani marlunni suli killisiorneqarsimannginnerarpoq, namminerlu isumaa malillugu taama pisuutitsiniutini taama ajortigisuni killisiorneqarnissaq pisinnaatitaaffigigaluarpaa.
- Saaffikkalu tamaavimmik ajornarnikuullutik. Uangaalluni tujorminartorujussuuvoq.
Ungaaq Poulsen taama oqarpoq. Taanna assigiinngitsuniit ikiortissarsiortarsimagaluarpoq, ilaatigut ombudsmandimut. Tusagassiorfiit kingullertut saaffigalugit oqarpoq.
Ungaaq Poulsenip sassarnermini ikiortissaasuaneq tunngavigaa. Atornerluisuunerminit ikioqqugaluarpoq. Eqqortup saqqummernissanut ikioqquvoq. Maannakkorpiaq imminulluunniit ikiorsinnaanngilaq. Ikorfartorteqartariaqaraluarpoq. Nukkili maannakkorpiaq ikorfartortituaraa.
Ungaaq Poulsen tarnip pissusaanut tunngasumik siunnersortimit ikiorneqarnissamut komminimi ukioq ataaseq sinnerlugu utaqqisuneereerpoq, kisianni Qeqqata kommuniata ilisimatissimavaa qaammaterpassuit suli utaqqisinnaasoq.
