Anaanaasoq ernumavoq

Allattoq Najaaraq Egede
februaarip 14-at 2006 10:26

Meeqqat assammik arsartartut Sisimiuni sungiusaatigalugu unamminissaat februaarip 17-ianit 19-ianut ingerlanneqassaaq. Meerarisalli 13-inik ukiullip Maniitsumit Sisimiunut ukiup taamaalinerani sukkasuuliamut ilaalluni unammiartornissaa angajoqqaajulluni akuerineqarsinnaanngilaq, taama oqarpoq Vilhelmine Thomsen, nukappiaqqamut anaanaasoq.

- Nassuerutigisinnaavara ippassaq unnukkut isumaqatigiinngitsorujussuuvugut. Ernera oqarpoq qanoq ukioq ataaseq sungiusareerlunga ilaassanngilanga. Februaariuvoq, sila qanoq ileriataartarpoq, aqqutaa isorartuujuvoq. Uanga naagaartariaqarsimavunga taamatut ukioqartillugu, oqarpoq Vilhelmine Thomsen

Meeqqat sungiusaasullu timmisartorsinnaasimasaluarput. Timmisartuussisarnerilli akuttummata inissalu killeqarmata ullut amerlavallaat sunatik Sisimiuni uninngaannartariaqartussaagamik, sungiusaasut sukkasuuliamik angalanissartik aalajangersimallugu, Klaus Berthelsen Aqissiaq-mi sungiusaasoq oqarpoq.

- Soorunami tusarnikuugaluarpara imatut kikkut eqqugaasut. Ilumut paasillugu aamma timmisartortartut eqqugaasut ajorpoq. Timersornerup ajornartorsiutit pilersinnaasut pinaveersaartittarpai. Angajoqqaajulluni meeraq sumiittoq nalunagu tassa toqqissisimanarnerpaaq.

Sukkasuuliartariaqalernerallu angajoqqaanut toqqissisimananngilaq. Ilimananngilaq unnugu assammik arsartartut angajoqqaavisa sungiusaasullu ataatsimiinnerat isummanik allanngortitsissasoq.

- Allatut ajornaqaaq umiatsiaarassappata naaggaartariaqassaanga.

Vilhelmine Thomsen oqarpoq. Sungiusaasoq Klaus Berthelsen ajuusaarpoq angajoqqaat siusinnerusukkulli aalajangiinermut ilaatinneqanngimmata. Oqarpoq angajoqqaat sukasuuliamik angalanissaq ulorianarpallaartutut nalilerpassuk soorunami aallanngitsuuginnarumaarlutik.

Nukappiaqqat assammik arsartartut pissartanngorniunnernut apriilimi pisussanut ilaasussaapput, taannalu akissaqartikkumaarlugu sungiusaasut oqaatigaat.