Amnesty International nalilersuinissamut kaammattuivoq
Peqqarniisaarniarneq akiorniarlugu inatsisiliaasut kingunerisai Danmarkip sukumiinerusumik misissoqqissaaqqittariaqarai, inuit pisinnaatitaaffiinik illersuiniaqatigiiffik, Amnesty International, nuna tamakkerlugu ataatsimeersuartoqarnissaa sioqqullugu, kaammattuivoq.
Allattoq Louise M. Kleemann
apriilip 28-at 2008 08:17
CIA-p tigusanik isertortumik timmisartuussisarnerata misissuiffigineqarnissaanut Danmark akerliujunnaaqqullugu Amnesty-p ilaatigut kajumissaarutigaa, tigusallu parnaarussivinni isertortuni naalliutsitaasarnerat nikanarsagaasarnerallu ilanngullugu taakkartorneqarpoq.
CIA-p isertortumik timmisartuussisarneranut atatillugu suna tamarmi misissoqqissaarneqartariaqartoq Inuit åisinnaatitaaffiinik illersuiniaqatigiiffik isumaqarpoq, ilaatigullu oqarluni tigusanik isertortumik timmisartuussisarnerit paasiniarnissaannut tusagassiorfiit inuillu pisinnaatitaaffii pillugit suliniaqatigiiffiit kisimik pisussaanngitsut.
Inuit pisinnaatitaaffii pillugit nalunaarut Naalagaaffiit Peqatigiit ukiut 60-it matuma siorna akuersissutigaat.
