Amnesty: CIA-p timmisartuussisarneri misissorneqarlik

USA-p isertortumik paasiniaasarfiata CIA-p, paarnaarussanik angallassisarnermini Kalaallit Nunaata silaannartaatigut ingerlaartarneranik Danmarkip misissuisitsisimannginera, inuit pisinnaatitaaffiinik illersuiniaqatigiiffiup, Amnesty Internationalip, isornartorsiorpaa.
Allattoq Jaaku Lyberth
novembarip 16-at 2010 10:24

CIA-p parnaarussanik angallassigunarluni Narsarsuarmut Kangerlussuarmullu aqqusaartarsimanera DR-ip ukioq 2008-p aallartilaarnerani paasivaa.

Danmarkimi naalakkersuisut pisoq pillugu namminneq inissisimanertik 2008-mi misissuiffigaat. Tamanna arlaannaannulluunnit attuumassuteqanngitsumik misissuinissamut piumasaqaatinut naapertuutinngitsoq, Amnesty International isumaqarpoq.

Misissuisitsineq parnaarussanik angallasisoqarsimaneranik uppernarsaananilu qulakkeerininngitsoq, oqaatigineqarpoq.

Danskit naalakkersuisui misissuisitsinissamut kommissioniliornissaat kaammattuutigalugu Amnesty International inatsisinut atuutsitsinermut ministerimut, Lars Barfoedimut allagaqarpoq.

Danmarkimi naalakkersuisut kisimik isornartorsiorneqanngillat. CIA-p parnaarussanik isertortumik angallassisarsimaneranik europami nunat arfineq-pingasut misissuisitsisimannginnerat, Amnesty Internationalimit aamma isornartorsiorneqarpoq.

Europami naalakkersuisut maannakkut pisunut nuanniitsunut akiuinissamut

piumassuseqanngillat, Amnesty International nittartakkamini allappoq.

Arlaannaannulluunnit attuumassuteqanngitsunik misissuisitsinissamik aallartitsisoqarnissaa kaammattuutigalugu Amnesty International, EU-p siulittaasoqarfianut allagaqarpoq. Allakkami EU-mi ministerrĂ¥dit arlaannaannulluunniit attuumassuteqanngitsunik misissuisitseqqullugit piumaffigineqarput.