Ammit nutaat tunisaaleqquai

Puisit amiinik suliarineqanngitsunik tunisisinnaaneq Illoqqortoormiuni piniartunut suli ajornarpoq, tamannalu piniartut peqatigiiffianni siulittaasup Jonas Napaattuup aaqqeqquaa.

-Taamaattoqarnera piniartukkormiunut ajorpoq. Ammit masattunik taaneqartartut piniartup tunisinnaaleraluarpagit ajornanngikkaluarpoq timmisartukkut ammit nassiussuunneqarsinnaanissaat. Aamma maaniippoq Nuka A/S-ip tunisassiorfia assiliaataannaasoq, taanna aamma atorluarneqarsinnaagaluarpoq, Ittoqqortoormiini piniartut peqatigiiffianni siulittaasoq Jonas Napaattooq oqarpoq, naggasiillunilu: -Piniartut amminik masattunik tunisisinnaaleraluarpata aningaasaqarnikkut pitsaanerusumik atugaqalissagaluarput.

Taama oqarpoq, Ittoqqortoormiini piniartut peqatigiiffianni siulittaasoq Jonas Napaattooq. Great Greenland-mi siulersuisuni siulittaasoq Paaviaaraq Heilmann oqarpoq, puisip amia masattumik taaneqartartoq Ittoqqortoormiini tunisassiarineqarsinnaalernissaa misissorlugu periarfissiunneqartoq. Misissorneqartunut ilaavoq ammit timmisartukkut umiarsuakkullu nassiussuunneqarsinnaanerinut periarfissat. Aamma Nuka A/S-ip tunisassiorfia Ittoqqortoormiini atorneqarani uninngaannartoq, puisit amiinik masattunik tunisassiorfitut atorneqarsinnaanersoq misissorneqarpoq.