Ammit masattut akitsorput

KNAPK Great Greenlandilu puisit amiisa akiinik ukiup sinneranut atuttussanik isumaqatigiissuteqarput.

Aataat natsiillu masattut amii 16 kr.-mik akitsorneqarlutik 301 kr.-qalerput. Puisit amiisa panertitat akiat allanngussanngilaq. Isumaqatigiissutigineqartoq Great Greenlandimit naammigisimaarneqarpoq.

Soormitaavaana ammit panertitat akii nikigatik masattut akitsortut? Tamatumunnga Great Greenlandip tunisinermut pisortaa Paaviaaraq Heilmann ima akissuteqarpoq:

- Ukiuni kingullerni ammit masattut tunisaanerulersimapput, tamannalu ilutigalugu paasineqarpoq ammit masattut suliariuminarnerusut pitsaassuserlu qaffariarsimalluni. Tamannalu pillugu KNAPK-lu isumaqatigiissimavugut ammit masattut pitsaassutsikkut ineriartortinneqarnissaat tamakiisumillu tunineqartalernissaat anguniarneqassasoq.

Paaviaaraq Heilmann oqarpoq ammit panertut siusinnerusukkut tunineqarnerusut ilarpassui iginneqartariaqartarsimasut, pitsanngorsaaniarnermilu masattut taamaalillutik salliutinneqariartuaarsimasut.

-Tamatuma kingunerisivaa ammit suliarineqartartut pitsaanerusullu amerlanerulernerat. Atorsinnaasut amerlanerit naammassineqartalerput masattut tunisaalernerisigut. Aap ammit masattut pitsaanerupput amernik atuilluarnissaq eqqarsaatigalugu.

Ammit masattut akii nutaat apriilip aallaqqaataani atuutilissapput.