Ammit akii pillugit isumaqatigiinniarneq qaqugu nangeqqinneqassanersoq naluaat

januaarip 10-at 2006 11:44

KNAPKp Great Greenland-illu ammit akii pillugit isumaqatigiinniarnerat tallimanngormat unitsinneqarpoq - ilisimaneqanngilarlu qaqugu nangeqqinneqassanersoq.

Isumaqatigiinniartut isumaqatigiissuteqaratik tallimanngormat avissaarput – qaqugulu naapeqqissanersut ilisimaneqarani. KNAPK-p Great Greenlandillu amernut akigitinniakkat isumaqatigiissutiginiaraluarpaat – iluatsinngitsumilli.

KNAPK-mi siunnersortip Niels Lange Andersen-ip isumaqatigiinniat sapaatip akunnera qaangiuppat aatsaat naapeqqissinnaassangatippai. Isumaqatigiinniaqqilinnginnermili naalakkersuisut saaffigeqqaarniarpaat, akissuteqariarpatalu isumaqatigiinniarnerit aallarteqqissinnaassanerarlugit.

Naalakkersuisut angalapput, aatsaallu januaarip 17-ni

uteqqissallutik.

KNAPK-p piumasaraa ameq ataaseq Great Greenland-ip nammineq 100 kr.-imik akilertassagaa. Maannakkut piniartoq Namminersornerullutik Oqartussanit amernik tunisinermini tapiiffigineqartarpoq.

Illuatungaatigut Great Greenland amernik pisinermi ameq ataaseq 45 kr. 05 øre-lerniarlugu neqeroorpoq.

KNAPKp piumasaraattaaq tapiissutit 22,5 mio. kr.-usut ameernernut 100.000-inut atorneqassasut.

Taamaalilluni Great Greenland-imut 100 kr.-mik piumasaqarnerup saniatigut piniartoq 225 kr.-nik tapiiffigineqartalissaaq.

Maannakkorpiaq Great Greenland-ip Canadamit amersisarsimanini niaqorluutigaa. Pisoq aallartippoq tallimanngormat KNAPK-lu isumaqatigiinniarnerit kipitinneqartullu.

KNAPKp siulittaasuata Peter Olsen-ip pisimasoq nalaatsornerunerarpaa, isumaqatigiinniarnernilu Great Greenlandip akiliinerunissaanik piumasaqarnermut aallaaviunnginnerarlugu.

-Isumaqatigiinniarnerit aqqutissaapput, sunniiniarnikkut anguniarneqassanngillat, piniartullu nikassarneqassanatik, KNAPKp siulittaasua Peter Olsen naggasiivoq.