Ammit akii appartinneqarmata tunisat marloriaatinngorput
Great Greenlandimi aningaasaqarniarneq ilungersunarsilluinnarmat septembarip oktobarillu qaammataanni akinit nalinginnaasunit appasinnerujussuarnik akilersillugit ammit tuniniarneqarput.
Allattoq Jaaku Lyberth
Qaammatini kingullerni marlunni 20 procentimik akikilliliineq tunisat aggustimi tunisanut saniliullugit marloriaammik amerlanerulerput.
Aningaasatigut ajornartorsiorneq qaangerniarlugu amminik akikilliliineq kisimi sakkugineqanngilaq. Inatsisartut aningaasaqarnermut ataatsimiititaliaa oktobarimi 8 miliuuni koruuninik tapiisariaqarsimavoq.
Pisortap Henrik Estrupip oqaasii naapertorlugit 8 miliuuni koruunit taakkua piniartut amminik tuniniagaannik akilersinnaalerpaat.
Kalaallit Nunaanni amminik tuniniaalluni akikilliliinerup saniatigut Great Greenland maannakkut nunani allani aamma akikilliliissamaalerpoq.