Ammit 4.000-t tunineqarput
Naalakkersuinermik suliallit puisit amii pillugit oqallinnerujussuat Danmarkimi uumasut amiinik tunisaqartartut ukiakkut akitsorterussineranni, Kopenhagen Fur-imik taaguteqartinneqartumi, malunniuteqarpiarsimanngilaq:
Kalaallit Nunaata ammerivianit puisit amii 4.000-t Danmarkimi uumasut amiinik akitsorterussinissami tunineqartussat nassiunneqarput tamarmillu ajornaqutitaqanngitsumik tunineqarsimasut Kopenhagen Furimi tunisinermut pisortaq Erik Neergaard oqaluttuarpoq.
- Ataatsimut isigalugu iluatsittumik uumasut amiinik akitsorterussilluarpugut – puisit amii soqutigineqarluarput tunisilluarpugullu, Erik Neergaard oqarpoq.
Taassuma ilisimatitsissutigaa nunanit tamalaanit puisit amiinik pisiniartoqarsimasoq, kiisalu puisit amii akigissaartillugit tamarmik tunineqarsimallutik.
- Puisip amiisa akissaatut aalajangiunneqarsimasoq 10 procentimik ilallugu akisunerusunngorlugit tunivagut, Erik Neergaard oqarpoq.
Puisit amiisa akissaanik aalajangiiisarneq nalinginnaasumik kingullermi akitsorterussunermi aalajangerneqartarpoq. Europaparlamentimi tusagassiutinilu puisit amii eqqartorneqaleruttortut – puisip amiisa akii qaffariarput – nunatsinnit puisip amia akisunerpaamik 1490 koruunilerlugu tunineqarpoq.
- Danmarkimi uumasut amiinik tunisaqartartut ukiakkut akitsorterussineranni angusatik ilorrisimaarutigaagut, Kalaallit Nunaata ammeriviani pisortaq Michael Nielsen, radioavisimut oqarpoq.
