Timersornermi ataqqeqatigiinneq GBU-p iliuuseqarfiginiarpaa

Tekle Ghebrelulip timersornerup iluani ammip qalipaataanik immikkoortitsisarneq Kalaallit Nunaanni Isikkammik Arsaattartut Kattuffianit iliuuseqarfigineqassasoq neriuutigaa.

AAMMA ATUARUK Ammip qalipaataanik immikkoortitsineq akiorneqarli

- Timersornermi naleqartitat ileqqullu, timersortoqartillugulu unammisanut, illoqarfimmit allaneersuuppata nunanilluunniit allaninngaanneersuuppata ataqqinninnermik takutitsinissaq, tamattalu immitsinnut qanoq pissuseqassanerluta, Tekle Ghebrelul oqarpoq

Pisut ataasiakkaat pillugit oqallinnermit timersornerup iluani ammip qalipaataanik assigiinngissitsinerup ajornartorsiutaanerata sammineqarnissaa pingaaruteqarnerusoq taanna isumaqarpoq.

AAMMA ATUARUK Pissartanngorniuttoqarnerani atugassarititaasut isornartorsiorneqartut

Kâgssagssuk ajuusaarpoq

- Kâgssagssummi arsaattartup taamatut iliuuseqarsimanera pillugu oqaloqatigivarput, ajuusaarnarpoq inuit ataasiakkaat kukkussutaat pillugit taamatut annertuumik kingunilimmik saqqummertoqarnera, arsaaattartup kukkusimanerminik nassuerutiginnilluni nammineq GBU-mut allagaqareerpoq. Isumaqarpugullu GBU-mit tamanna avammut nalunaaruteqarnermi ilanngunneqarsimasariaqaraluartoq, Kagssagssummi sungiusaasoq Ole Martinsen tusagassiuutinut nalunaarummi allappoq.

AAMMA ATUARUK Ammimi qalipaataa tunngavigalugu nikassarneqarnini aalassaatigigaa

GBU: Suliniuteqartoqassaaq

Kalaallit Nunaanni Isikkammik Arsaattartut Kattuffiata siulittaasuata John Thorsenip timersortoqartillugu pissuserissaarnissaq pingaartinneqartuummat suliniuteqartoqassasoq oqaatigaa. Taassumali siulittaasutut kisimi qanorpiaq suliniut ingerlanneqassanersoq aalajangersinnaannginnamiuk ilaasortat peqatigalugit aaqqissutaasinnaasumik ujartuiniarnerarpoq.

- Inuup ataatsip aalajangissanngilaa. Ataqqeqatigiinnissap taakkartortuarneqartarnera taassuma iluaniissaaq oqaluuserisassarput siulleq. Qanoq malitseqartissanerlugu immaqa ukiamut GBU-p ataatsimeersuarnerani nassaarineqarsinnaassaaq, John Thorsen oqarpoq.

AAMMA ATUARUK Aallarnissannut piareeraluarpunga