Ammip qalipaataa pillugu assortuussutaavoq
Norgemi nunasisut pillugit oqallinnerup torernerusumik ingerlanneqarnissa Talerperliuniat siulittaasuata, Erna Solbergip, taamaalilluni kaammattuutigaa, muslimillu ajornerpaamik ullumikkut saassutarineqaleraangata Tysklandimi Nazistit siuttuunerisa nalaanni juutinut iliuuserisartagaannut tamanna assersuunneqarsinnaasoq isumaqarluni.
- Islamimut ingasattajaarlutik ullumikkut akerliusut muslimit pillugit eqqartueriaasiat, 30-kkunni ingasattajaarlutik juutinut akerliuniat juutinik pillugit eqqartueriaasiannut, kingornatigullu sorsunnersuaqalersitsisumut, assinguvoq, Solberg norskit aviisiannut VG-mut oqarpoq.
Ammip qalipaataanik ulluinnarni immikkoortitsisarnerup, ilaatigut suliffissuaqarnermi, internetikkut aamma naalakkersuinermi oqallinnermi malunniuttartup, oqallisigineqarnissaa taamaatinneqarnissaalu taassuma kaammattuutigaa.
Europami islamimik siaruarterinianermut akerliulluni mumisitsiniarnini tunngaviliullugu, peqqarniitsumik Anders Breivikip Norgemi saassussinerata kingorna, inuit 77-it inuunerannik akeqartup, Erna Solbergip oqariartuutaa tutsiuppoq.
- Avataaniit sunnerneqarsimanermik pissuteqarsimasinnaaneranik tamanna ilimanarsisitsivoq, Erna Solberg oqarpoq.
Norgemilumi ullumikkut ulloq inuulluaqqusiviuvoq. Tassami Anders Breivikip toqutaasa ilaat 18-it Norgemi sumiiffinni assigiinngitsuni ilineqassapput, taakkununnga ilaalluni qallunaaq, Hanne Anette Ballach Fjallestad.
