Amminik atisaliat qanillillugit assileqqissaarpaat

Kilut, qimmit amii, tuulliit amii, mitit meqqui, annoraami putuarannguaq aarnussamut ikkuffiliaaraq, ila assilisaararpassuit assigiinngikkaluassusai. Tassa tamakkuupput Danmarkip katersugaasivissuata atisanik katersugaataasa sukumiisumik assiliortorneqarnerini qarasaasiamullu toqqorterneqarnerini aallunneqartut.

Assiliisartullumi Roberto Fortunap teknologi nutaaliaanerpaaq atorlugu assiliortuineq sukumiisumik ingerlanneqarnera ima nassuiarpaa:

- Atisaliaq gradinik 15-nik nikikkaangat assiliissutip nammineerluni assilisarpaa, tassa atisaliaq tamavimmi kaajallavillugu assiliortorneqassaaq. Roberto Fortuna oqarpoq.

Tamatuma kingorna assilisat qarasaasiamut toqqorterneqassapput, qarasaasiarlu atorlugu atsisaliat qanillivillugit qimerloorneqarsinnaalissallutik. Assiliissut atorneqartoq 30 millionit pixel-inik ersarissuseqarpoq.

Taamaammat kilut, ilami suut tamavimmik assini ersarissumik takuneqarsinnaapput. Ilami atisassioriaatsit takulluarneqarsinnaaniassammata atisat ilisimatuunit titartaganngortinneqarsimapput, paasiniaasullu kikkulluunniit qanoq amminik atuitigisoqartigisimanersoq missingersorsinnaaniassammassuk.

Tassa assit atorlugit inuiaat atisaat qimerluuginnarlugit taakku inooriaasaat, kikkunnut ataneri qanorlu akunnerminni attaveqatigiittarsimanersut takuneqarsinnaalissammat.

- Tassa naggueqatigiit Kalaallit Nunaanniittut Canadamiittullu sutigut assigiinngissuseqarnersut takusinnaanngussavarput, asulu Sibiriamiut Samillu assigiinngissutaat aamma takulluaneqarsinnaalissalluni.

- Aanaveersaatitsinermik suliaqartartoq, assiliortuinermilu siuttuusoq Anne Lisbeth Schmidt taama oqaluttuarpoq, assillu qarasaasiamut toqqorterneqartut siunissami tamanit alakkarterneqarsinnaalernsinnaanissaanut akissaqalernissaq neriuutiginerarlugu:

- Tassa assilisat atorlugit illit Kalaallit Nunaanniikkaluaruit, ilami sumiikkaluaruilluunniit qarasaasiami quppersagatsinnut isiinnarlutit assilissat kusarnartut qimerloorsinnaanngussavatit, isumassarsiorfigalugit imaluunniit toqqortaativut allat ersarissunik assilisat atorlugit qimerloorsinnaanngussavatit,  Ane Lisbeth Schmidt oqarpoq.

Nunattalu Katersugaasivissuani toqqortat aamma assiliortorneqarsinnaanissaat ilisimatuut neriuutigigaat oqaatigineqarluni.

Danmarkip katersugaasivissuat amminik atisalianik katersaateqarnerpaajusup atisaatai ilaatigut Alaskameersuupput, Sibiriameersuullutik, Samineersuussullutik kiisalu Canadami Nunatsinnilu naggueqatitsinneersuullutik.

Katersugaasivissuarmi atisat katersat affaat Kalaallit Nunatsinneersuupput. Taakku amerlanersaat Knud Rasmussenip tallimassaanik Thule-ekspedetionimik taagorneqartumi tusaamasaasumi ilisimasassarsiornerani katersaapput.

Atisanik assiliortuineq ukiup massuma naalernerani naammassissangatinneqarpoq, suliniullu Nationalmuseumip suliniutaani Nordlige Verdener - tassa Nunarsuup Avannaaneersunik kalaallisut nutsersinnaasatsinnik qulequtaqarpoq.