Ammimi qalipaataa tunngavigalugu nikassarneqarnini aalassaatigigaa

Maniitsumi isikkamik arsaattoqarnera ammip qalipaataa tunngavigalugu nikassaanermik kinguneqarpoq, nunanummi allanut unammisartut sungiusaasuat nunagisaminut angerlaqquneqarmat.

Futsalimik nunatsinni pissartanngorniunnerit Maniitsumi sakkortuupilussuarmik ingerlanneqarput semifinalertoqareermalluni timersortarfissuarmi isiginnaartut kamannermit putupput.

Isikkamik arsaanneq nuannersuuniaraluartoq B67-ermiut Kâgssagssummut ajugaanerisa kingorna nuanngitsumut saatsinneqarpoq.

 - Nunatsinni suit? Nunatsinni susassaqanngilluinnarputit. Kalaallit Nunaanniissanngilatit, Kalaallit Nunaanni atorfissaqanngilatit.

B67-ip siungiusaasuata Tekle Ghebrelulip Futsalimi nunatsinni pissartanngorniunnerni semifinalip kingorna qanoq pisoqarsimanera taama oqaluttuaraa.

Kamaannerujussuartoq

Sungiusaasoq Afrikami Eritreameersuuvoq. Nunatsinni ukiuni 14-ini najugaqarpoq isikkamillu arsaallutik nunanut allanut unammisartut sungiusaasuuffigalugit. Maniitsumullu tikilluaqqusaanngitsutut misigititaavoq timersortarfissuarmi isiginnaartut arlallit nunagisaminut angerlaqqullugu oqarfigimmanni.

- Assut tujorminarpoq uuminaqalunilu, naakkut malugisinnaavara kaamaammerujussuarlunga.

Unammisartuni B-67-imeersut semifinalimi Kâgssagssummut ajugaaqqammersut Ghebrelul silaannarissarniarluni timersortarfimmit aniartorluni inersimasunit meeqqanillu suaartarneqarpoq.

- Ingerlaannarpunga malippaanngali oqarfigalungalu angerlassasunga uteqqinngisaannarlungalu, Tekle Ghebrelul taama oqaluttuarpoq.

Pisoq ingasannerulerpoq Ghebrelulip meeqqat inuusuttullu oqarfigimmagit tikeraatik iluamik oqaluutissagaat.

 - Taava angutit arnallu inersimasut ornippaannga oqarfigalungalu meeqqat taamatut oqaluutissanngikkikka. Ila, qanoq oqalunnersut tusaannginnakkit? Qanoq oqalunnersut apeqqutaanngilaq, meeqqat taamatut oqaluunneqarneq-ajorput.

GBU-p siulittaasua akuliuppoq

Nalunaaquttap akunnerata affaata missaani taamaaliortoqareersoq GBU-p siulittaasua John Thorsen akuliuppoq isiginnaariallu mikrofonikkut oqaaseqarfigai isikkamik arsaattunik isiginnaarnermi qanoq pissusilersortoqartarnissaa erseqqissaatigalugu.

- Ammip qalipaataa tunngavigalugu nikassaanerit suulluunniit akuerineqarsinnaanngillat, GBU-p siulittaasua taama oqarpoq.

Ammip qalipaa tunngavigalugu nikassaasarnerup akiorniarneqarnera nunani tamalaani isikkamik arsaannerup iluani annertuupilussuuvoq, Tekle Ghebrelulilli ammimi qalipaataa tunngavigalugu nikassarneqarneq Nunatsinni aatsaat misiginngilaa.

Isikkamik arsaalluni nunatsinni pissartanngorniunnerit Aasianni 2012-imi ingerlanneqarmata unammisanit sungiusaasumillu suaartarneqarpoq.

 - Aapakaajunerarpaatigut Afrikameersut, aamma nunatsinnut angerlaqquaatigut. Aamma arsartartut pingasut-sisamat kalaallimik ataataqanngikkunik anaanaqartut qaamasunillu nujallit qallunaapalaajunerartillutik angerlaqquneqarput.

Siulittaasoq tusaaniarneqarsorivoq

GBU-p siulittaasuata nunatsinni isikkamik arsaannerup iluani ammip qalipaataa tunngavigalugu nikassaasoqartarnera immikkoortitsisoqartarneralu ilisimanerarpaa. Pingaartumillu arsaattartut Nuummiut danskisuinnaq oqaluttut persarineqartarnerat erseqqissaatigaa.

Thorsenili isumaqanngilaq ajornartorsiut nalinginnaasuusoq, aamma isumaqarpoq oqalugiarnini Maniitsumi isiginnaarianit paasilluarneqartoq aammalu ammip qalipaataa tunngavigalugu nikassaasoqannginnissaa isumaqataaffigineqartoq.

- Timersortarfissuarmiittut tamarluinnarmik isumaqataarpasipput. Ersaattaapput oqariartuutigineqartorlu paaserpasillugu.

Tekle Ghebrelulip neriuutigaa ammip qalipaataa tunngavigalugu nikassaasarnerup akiorniarneqarnissaa najukkami timersoqatigiiffiit nammineerlutik iliuuseqarfigiumaaraat, eqqugaasumut annernartuummat.

- Kamaqalungalu nikallungassutigeqaara. Qanoq pissanerlugu naluara, nunanut allanut unammisartut sungiusaasuat taama oqaluttuarpoq.

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat