Ammeriviup Great Greenlandip misissuiffigeqqissaarneqarnissaa suli aalajangiusimavaat
Ammeriviup Great Greenlandip misissuiffigeqqissaarneqarnissaanik piumasaqaateqarneq Atassummit aalajangiusimaneqarpoq.
Atassutip gruppiata siulittaasua, Augusta Salling, naalakkersuisut siulittaasuannut, Hans Enoksenimut, paragraf 36 atorlugu apeqquteqaateqarpoq.
Hans Enoksenip inatsisartut oqaluttarfianit februaarip 17-ani oqaaserisai Augusta Sallingip erseqqissumik paaserusuppai.
Atassutip paasinninnera naapertorlugu, Hans Enoksen taamani oqarpoq, Great Greenlandip ingerlanneqarnera misissueqqissaarfigineqassasoq.
Atassutip siulittaasuata, Finn Karlsenip, Great Greenlandimi aqutsisunik pinerluttuliorsimasutut pasillernerata kingorna, Hans Enoksen allamik oqariartuuteqarpoq, tassa Great Greenland misissueqqissaarfigineqassanngitsoq.
Taamatut oqariartuuteqarneq Atassutip apeqquserpaa.
- Inatsisartut oqaluttarfiannit neriorsuieriarluni killormuuanik oqaannartoqarsinnaanngilaq, Augusta Salling Radioavisimut oqarpoq.
Great Greenland misissuiffigineqassanersoq Naalakkersuisut siulittaasuannut apeqquteqarnerminni, Atassummi ilaasortat erseqqissumik akineqarnissartik kissaatigaat.
