Ammerivissaq Ittoqqortoormiini ammartoq

Tsakker ammit Qaqortumut nassiunneqannginneranni, ammeriviussaaq.

Allattoq Markus Valentin

marsip 04-at 2026 13:57

Nutserisoq Medea Olsen

Kommuneqarfik Sermersuumi partiit tamarmik, siorna decembarimi missingersuutinut isumaqatigiissuteqarput. Tamanna Tunup ineriartornissaanik qulakkeerinnissaaq.

Piniarnermik inuussutissarsiuteqartut atugarissaarnerulersikkumallugit misissuisoqarnissaa pilersaarusiorneqarpoq.

Tamanna najukkami tunisassiorfinnik pilersitsinikkut ilaatigut pinissaa, 'Ittoqqortoormiit inuussutissarsiornermi periarfissaminik annertuunik ullumikkulli atorluarneqanngitsunik atuilluarnerulernissaa anguniarlugu', missingersuutinut isumaqatigiissummi allassimavoq.

Aamma atuaruk Avaaraq Olsen: Aningaasanut missingersuusiat nutaat Ittoqqortoormiini ineriartortitsissapput

Borgmester Avaaraq Olsen (IA) Tunu pillugu KNR-imit apersorneqarami taamanikkut ima oqarpoq:

- Piaartumik aallartittariaqarpugut.

Kommuneqarfik Sermersooq Ittoqqortoormiinit nutaarsiassamik tusagassiuutinut maanna nalunaaruteqarpoq.

Ittoqqortoormiini suliniutit nutaat

Inuussutissarsiutigalugu piniartuunerup ineriartortinneqarnissaata saniatigut, Kommuneqarfik Sermersuup aningaasanut missingersuusiornermut isumaqatigiissusiornera nutaaq suliniutinik allanik Ittoqqortoormiinut iluaqutaasussanik imaqarpoq.

Inuussutissarsiortut oqaloqatigiittarfiat, suliffeqarfinnik suleqateqarnermik nukittorsaasussaq. Nuummi, Paamiuni, Tasiilami najugaqarfiusunilu minnerusuni assingusumik pilersitsisoqassaaq.
Misissueqqaarneq sunngiffimmi peqatigiiffimmit aallartinneqassaaq. Holmip Illuata Atuakkat Illuannut allanngortinneqarnissaanut aningaasat immikkoortinneqarput.
Utoqqaat aningaasaateqarfiannit Ittoqqortoormiini utoqqarnut ataatsimoorfimmik pilersitsisoqassaaq. Tasiilamilu utoqqaat illuannut Nuummilu puigortunngorsimasut angerlarsimaffiannut aningaasanit immikkoortitanit aningaasaliisoqassaaq.

Allisiguk

Suliaqarfik nutaaq

Ammerivik nutaaq marlunngornermi ammaanersiorneqarpoq.

Suliaqarfiup Tsakker taagutigaa.

Ittoqqortoormiini illoqarfiup pisortaata, Charlotte Pikep, suliaqarfiup pingaaruteqarnera tusagassiuutinut nalunaarummi oqaasertalerpaa.

Aamma atuarukIlisimatusarneq nutaaq Tunumi nannuttassanut amerlanerulersitsissasoq

- Tsakker atorlugu inuussutissarsiutigalugu piniarnerup siunissaqarnissaanut aningaasaliivugut, illumut siunertarineqartup ineriartortittuarsinnaaneranik. Ileqqutoqqat, inuussutissarsiorneq najukkamilu ineriartortitsineq suliniummi matumani kusanartumik ineriartortinneqarput, illoqarfiup pisortaa allappoq.

Great Greenland sumiiffimmi amminik tigooraasussamik amminillu Qaqortumut nassiussisartussamik isumaqatigiissusiorsimasoq, Kommuneqarfik Sermersooq paasissutissiivoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.