Ammerivik namminersortunngorsarsinnaavoq

maajip 18-at 2006 15:02

Ammerivik Great Greenland aappaagumiit namminersortunngorsinnaavoq.

Piffissami kingullermi Ammeriviup perulluliuutaanera Qaqortumi suliffinnik piiujuaannartitsinissamut ernumalersitsivoq. Qaqortumi suliffiutillit Qaqortullu kommunea Ammerivimmut saaffiginnissuteqarsimapput.

Siunnersuutigaat Ammerivik mersortarfialu tuniniarneqassasut.

Pisisussanik isumaqatigiinniavinnissat suli aallartinneqanngillat. Namminersornerullutik Oqartussat pigisaanni Great Greenlandimi ataasinngormat ataatsimeersuarneqarpoq. Naalakkersuisut siulittaasuata Hans Enoksenip suliffeqarfiup piginnittuisa allanik ilaneqarnissaat ilalernartippaa.

Qaqortumi inuussutissarsiornermi ataatsimiititaliap siulittaasuata Kaj Egedep piginnittunit akineqarnissartik utaqqinerarpaa; tassalu Naalakkersuisut tuniniaassanersut.

Tunisisoqassappat akissaa taaneqanngilaq. Radioaviisimiilli paasisavut tunngavigalugit ammerivik 8 mio. kr.-t missaanni akeqassangatinneqarpoq.