Ammerivik namminersortunngorsarneqarli

Nunatta Ammerivia - Great Greenland - namminersortunngorsartariaqarpoq, Qaqortup kommunea taama isumaqarpoq. Tamannalu pillugu Qaqortup kommunea Naalakkersuisut siulittaasuannut Hans Enoksenimut junimili saaffiginnissuteqarpoq, maannamut suli akineqanngitsumik. Qaqortup kommunea, inuussutissarsiornermut ataatsimiititaliaq Ammerivimmillu ingerlatsisut suleqatigiillutik suleqatigiissitamik pilersitsisimapput, Ammeriviup siunissami nammineernerulluni, politikkimullu pituttugaanani, ingerlalernissaanik suliniuteqartussamik.

Ammeriviup namminersortunngorsarneqarnissaanik kissaateqarnertik Qaqortumi borgmesterip Simon Simonsenip ima tunngavilersuuteqarfigaa:

- Suliffeqarfik Ammerivik Qaqortumi suliffeqarfinnut annerpaanut ilaavoq 80-inik sulisoqarluni, siunissarissaarnissaalu kommunep tungaanit soqutigisaraarput.

Ammerivimmik namminersortunngorsaanerup massakkut ingerlatsinermit pitsaanerussuteqarnera Simon Simonsenip tunngavissaqartilluarpaa:

-Ilisimavarput ukiuni kingullerni politikkikkut ammerivimmut akuliuteqattaarnerit suliffeqarfimmut annertoorujussuarmik akornusiisimasut. Neriuppugut namminersortunngorsaanermi ajornartorsiutit tamakku annikillisarneqarsinnaajumaartut, taamaalilluni politikkikkut tatisimaneqarpallaarnani Ammeriviup ingerlasinnaanissaa qulakkeerneqassalluni.

Qaqortumi suliffeqarfiit Ammerivimmilu sulisooreersut Ammerivimmik piginnittunngorsinnaanissaat Qaqortup kommuneata angorusuppaa.

- Imaasinnaavoq Ammerivik akisunerpaamik piseruttumut tunineqartoq, kisianni Ammerivimmi sulisut, Qaqortumi suliffeqarfiit piginneqatigalugit, ingerlanneqarsinnaanissaa Qaqortumi soqutiginerpaavarput.

Simon Simonsen neriuppoq saaffiginnissutertik Naalakkersuisunit pimoorullugu tiguneqarumaartoq.

- Ammerivik ataatsimeersuarmat namminersortunngorsaasinnaaneq Naalakkersuisunit oqariartuutigineqarpoq, tamannarpiarlu aallaavigalugu suliutit kommuniminngaaniit ingerlatilernikuuagut.