Ammeriveeqqat taperneqartalissapput

aggustip 09-at 2005 12:46

Nunatsinni mersortarfeeqqat aamma taperneqartalerniassammata Nunatta Ammerivianut tapiissutaasartut 2,9 million koruuninik aningaasartallit peerneqarnissaat Inatsisartut aalajangigarigaat, tamannalu aamma nunatsinni unammilleqatigiinnermut ataatsimiititaliap piumasaqaatigisimagaa, Sulisoqarnermut Naalakkersuisoq Johan Lund Olsen oqarpoq.

Nunatta Ammeriviani siulersuisut aalajangersimapput, ammeriviup mersortarfiani sulisut 2006-mit ikilisikkiartuaarneqassasut, tassanilu suliffiit 20-t missaanniittut atorunnaarsinneqarnissaat ilimagineqarpoq. Namminersornerullutik Oqartussat tapiissutigisartagaasa ammeriveeqqanut aamma tutsinneqartalernissaat pissutaatinneqarpoq, tamannalu Inatsisartut, Unammilleqatigiinermilu Ataatsimiititaliap piumasarisimagaat Naalakkersuisunut ilaasortaq Johan Lund Olsen oqarpoq.

Aamma Nunatta Ammerivia eqqarsaatigalugu suliassanik allanik suliaqartoqalersinnaanera misissorneqartoq Naalakkersuisunut ilaasortaq oqarpoq. Tassanilu illumi pequtit puisit amiinik qalilersorneqarsimasut eqqarsaatigineqartut oqaatigineqarpoq.

Kangiani nunat pingaartumik Kina amernik mersorneq eqqarsaatigalugu nunatsinnut unammillertutut oqaatigineqarpoq. Taamaammat Nunatta Ammeriviata nukittuffigisai ingerlanneqarnerulissasut Naalakkersuisut inassutigisimagaat, Sulisoqarnermut Naalakkersuisoq Johan Lund Olsen oqarpoq. Erseqqissaatigaalu Nunatta Ammerivia Great Greenland taperneqaqqulluni aamma qinnuteqartarsinnaajuassasoq.