Ammerisut kiappallaarmat unnilisinnaanngillat

Silaannaap kissatsikkiartornera kalaallisuunik mersortartunut aamma sunniuppoq.

Unnerit issilluartumi panertitassaapput, issilinngippallu unniliortoqarsinnaanngilaq. Tamanna Uummannap nunaqarfiisa ilaanni Qaarsuni mersortarfiup Neriunap misigaa.

Kalaallisooqassagaanni unnerit tungujorsiallu pinngitsoorneqarsinnaanngillat, unnerillu tassapput puisip amia issilluartumi silaannarmilu panerluartumi suiataartumilu qaqoqqissaartunngorlugu panertitassaq. Tassalu imaappoq sila issilluanngippat unnilisoqarsinnaanngilaq.

Ammeriviup Neriunap pisortaa Ane Tobiassen ima oqarpoq:

- Ammerinitsinnut akornutaaqaaq assullu kinguarsarpugut issangiaqattaarnerami pissutigalugu unnulisinnaanngilagut naak unnulinissatsinnut pisariaqartitsigaluarluta, Ane Tobiassen oqarpoq.

Taanna aperaarput nalinginnaasumik qanoq ilinikkut unnilisaraluarnersut.

- Issileraangat novembarimiit aallartittaraluarpoq, oqarpoq.

Ane Tobiassen nassuiaavoq unneq kusanassaguni qernaluttortaqarani qaqortuussasoq, silami sivisuumik innersimallutik issinneranik anorsaarneranillu qaqortikkiartortarput. Kisianni suli unneq paninngitsoq issangialeriataarpat unneq ajorsissaaq atorsinnaajunnaarlunilu, unnermi kusanartussariaqarami. Piffissarlu sivisooq atorlugu panivinnissaata tungaanut silamiititassaavoq, Ane Tobiassen nassuiaavoq.

Taanna aperaarput ullumikkut silap allanngorartarnera qanoq unniliaannut sunniuttarnersoq tassami issileraangat aqaguani issinneq ajormat.

- Ajorpoq, akornutigaarput suliassatsinnut unniliassaraluagut tungujorsialiassaraluagullu uninngatiinnarpagut issilivinnissaa utaqqillugu, Ane Tobiassen oqarpoq.

Ammerivik Neriunaq 1984-mi atuutilerpoq, ukioq mannalu aatsaat unnilinngitsoorlutik Ane Tobiassenip oqaatigaa.

Unnerit akisupput ammeriviullu tamanna aningaasanik annaasaqaatigaa.

- Unnerit unnaassallu assut aningaasanik iluanaarutaasaraluarput maannali taama ittunik iluamik tunisaqarsinnaajunnaarpugut, oqarpoq.

Ane Tobiassen aamma erseqqissaavoq, aasamut apersortittussanut kalaallisuuliamik angummeqqunnissaat neriorsuutigisinnaanngikkini.

Ammerivik Neriunaq siusinnerusukkut namminersortuuvoq maannali Uummannap kommuneata ataani aqunneqarpoq.