Ammassiviup eqqaani nuna suli ikuallappoq
Kujataani politeeqarfeqarnermut pisortaq Bent Ole Kleist oqarpoq, cigaretti qamilluarsimanngisaq nunami ikuallatsitsilersimasinnaasoq.
- Nuna nammineq ikuallalernavianngilaq, taamaammat asimiitilluni mianersortariaqarpoq, pujortarniaraannilu qamilluartarnissaa kajumissaarutigaarput, oqarpoq.
Ammassiviup eqqaani 500 meterinik qatsissusilimmi nuna ikuallappoq, taamaammat qatserisartut qulimiguulimmut ilaallutik ikuallattoq ornittariaqarsimavaat. Nunarujussuaq arsaattarfiit arlalissuit angeqqataat ikuallatoorsuuvoq. Ikuallanneq sisamanngormat ualikkut aallartittoq taamanili qatserisartunit inoqarfinnit qanittuniittunit qamisarneqarpoq. Ammassivimmit, Alluitsup Paanit, Qaqortumit aamma Nanortalimmit takkuttut tamaviaarlutik qamisaapput.