Ammassassualerngusaannermi Island pilliuteqarumavoq

Islandimiut Savalimmiormiullu EU avaqqullugu ammassassuarnut pisassiissutinik siorna qaffaanerat EU-mit assuarineqareersorlu isumaqatiginninniarnerit nangeqqinneqarput.
Allattoq Louise M. Kleemann
marsip 16-at 2011 13:11

Isumaqatiginninniarnerit ullunik pingasunik sivisussusillit angusaqarfiunngitsumik naammassisullu Islandimit aallartitaanit nalunaarutigineqarpoq islandi pisassiissutinik appaanissamut piareersimasoq.

- Neriuppugut annikinnerusumik pisassiinissamik oqariartuuteqarnerput EU-mit Norgemillu tigulluarneqassasoq, Islandimiut isumaqatiginninniartartuat Tómas Heidar BBC-mut oqarpoq.

Taamaattoq illuatungeriit suli imminnut ungasippallaartut, Norgemiut isumaqatigininniartartut siuttuat Johan Henrik Williams oqarpoq.

Isumaqatiginninniarnerit qaqugu aallarteqqinneqassanersut Johan Henrik Williamsip suli oqaatigisinnaanagu BBC-mut oqarpoq.

Ammassassualerngusaanneq aallartippoq Islandimiut aggustimi pisassatik 2.000 tonsiniit 130.000 tonsinut qaffammatigit, aamma Savalimmiormiut pisassatik 25.000 tonsiniit 85.000 tonsinut qaffallugit. Pisassiissutinik qaffaaneq EU-mit akuersissutigineqanngilaq.

Islandimi ukiormannamut pisassiisutit 146.000 tonsinut qaffaqqinneqarput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq