Ammassassualerngusaanneq WTO-p aaqqiivigerusuppaa

Danskit naalakkersuisuisa Savalimmiut EU pillugu naammagittaalliuutaat danskit naalagaaffeqatigiinnerat pissutigalugu WTO-mut pisortatigoortumik tunniuttariqarsimavaat.

Savalimmiut lagmandiata Kaj Leo Holmip taamatut aalajangiisoqarsimanera iluarisimaarpaa.

- EU-p aningaasarsiornikkut killersuinissamik aalajangiisimanerata atorunnaarsinneqarnissaanut alloriarneruvoq pingaarutilik eqqortorlu, lagmandi nittartakkamini pisortatigoortumi taama allappoq.

Savalimmiut ammassassuarnik ataatsimoortumik pisassiissutit pillugit isumaqatigiissutaasut pingasoriaataannik aalisarnerarlugit EU siorna aggustip qaammataani Savalimmiunut killilersuilerpoq. Peqatigitillugu savalimmiut avaleraasartuunik aalisarnerat pillugu assingusumik aamma aaqqiagiinngissuteqartoqarpoq.

Killilersuutit ilagaat savalimmiormiut ammassassuarnik aalisartuisa EU-mi umiarsualivinnut tulaqqusaajunnaarnerat Savalimmiuniillu ammassassuarnik EU-mut eqqusseqqusiunnaarneq.

Savalimmiut aalisartui EU-p killilersuinerata kingunerisaanik piffissami kingullermi Ruslandimut, Kangianut Afrikamullu aalisakkanik tunisisarput.

- EU-p aningaasaqarnera Savalimmiut aningaasaqarnerata quleriaatigaa, Savalimmiullu aningaasarsiornikkut killilersuiffigineqarnerat Savalimmiut aningaasaqarnerannut tamarmut malunnaatilimmik sunniuteqarput, lagmand Johannesen taama oqarpoq.