Ammassallup kommunea aningaasanik atorniarpoq
Kommuunit nakkutilliisoqarfiat Tasiilamukarlutik aqagu aallassapput, kommuni aningaasaqarnikkut ajornatorsiuteqartoq tamakkiisumik paasiniariartorlugu.
Kommunip aningaasaqarnikkut inissisimanera qanoq ajortiginersoq paasiniarparput, Kommunit nakkutilliisoqarfianni allaffimmi pisortaq Leif Scharling Sermitsiamut oqarpoq.
Kommuni akiliisinnaassuseqarniarluni 18,4 millioni koruuninik atorniarpoq.
Kangia Kitaata kommuunissaata ikaarsariarnermi ataatsimiititaliaa kommunit januaarip aallaqqaataani 2009-imi kattuppata aalajangiisuusussaq atorniarnerup itigartitsissutigineqarnissaa naalakkersuisunut innersuussutigaa.
Kangia kitaata kommuneani ikaarsaariarnermi ataatsimiititaliap siulittaasuata Asii Chemnitz Narupip Ammassallup kommuniata aningaasaqarnikkut ajornartorsiornera pillugu oqaaseqarnianngilaq, Ikaarsaariarnermi ataatsimiititaliap aningaasaqarnermut ataatsimiititaliaa ullumi ilisimatitsissuteqarfigitinnagu, Asii Chemnitz Narup aviisimut Sermitsiamut ullumi saqqummersumut oqarpoq.
