Ammassallip sunniutikinnerulernissaa ernumassutaavoq

- Ittoqqortoormiiniikkaluaruni, Nuummiikkaluaruni Ivittuuniikkaluaruniluunniit qinigaq ataaseq qinigaanerpaaq isertussaavoq, kisianni illoqarfiit qinikkaninngaanniit qanormitaava aqunneqassappat? Vittus Mikaelsen aperivoq nangillunilu:

- Assersuutigalugu Danmarkimi byrådeqarpoq, tamanna nunatsinni atuutilissanersoq suli qulakkiinngilarput, tamannalu nalornissutigaara.

Tunumut tunngassuteqartunik aalajangiisoqassatillugu, assersuutigalugu Nuummut aqqutip ungasinnerulernissaa Vittus Mikaelsenip ernumassutiginngilaa.

- Taamatut isumaqanngilanga, kisianni akisussaaffiit tamaasa qinikkamut ataatsimut nuutsinniarneqassappata naatsorsuutigaara qinigaq annertoorujussuarmik suliassaqalissasoq, soorlu teknikkeqarnermut, isumaginninnermut atuarfeqarnermullu tunngasutigut. Illoqarfimmi akisussaasoq kisimiitinneqassappat takorloorsinnaavara inuup ataatsip nukiit annertuut issianermini atulissagai, Vittus Mikaelsen oqarpoq.

Kommunimut qinersinermut atatillugu Ammassalimmiit qinikkat marluk pingasulluunnit isertinneqarnissaat Vittus Mikaelsenip neriuutigaa.

Ammassallip kommunea 3.000-inik inoqartoq Ittoqqortoormiit, Ivittuut, Paamiut Nuullu peqatigalugit Kangia-Kitaani kommuneqatigiilissapput.