Ammassalimmi borgmesteri taarserneqalerunarpoq
Allattoq Mads Lynge
apriilip 06-at 2005 07:44
Ammassalimmi kommunalbestyrelsi qulingiluanik ilaasortaqariarluni, aqqanilinngorput. Kommunit aaqqissuusseqinneqarneranni ilaasortat marlunnik ilaneqarput.
Ammassallip Kommuneani taasinerit kisinneqarnerini takutippaat Atassutip ilaasortaatitai ilanngarnatik sisamaaginnassasut.
Siumukkut ataatsimik ilallutik tallimaniit arfinilinngorput.
Inuit Ataqatigiit ilaasortaatitaqarsimanatik maanna ataatsimik ilaasortaatitaqalerput.
Borgmester Vittus Mikaelsen Siumumeersoq, borgmesteriunini annaassagunarpaa parteeqatiminut Jaappili Boassenimut. Jaappili Boassen 83-init taaguunneqarsimavoq, Vittus Mikaelsenilu 69-init taaguunneqarsimalluni.
