Ammassalik Radio nalunaarpoq: Over and out

Ammassallip Radioa 1925-mi pilersinneqarpoq, Tunumilu imarsiortut ukiuni 86-ini sullissimallugit.

Teknikkikkut ineriartornerup radioqarfinnik ataatsimuulersitsineq ajornarunnaarsissimavaa, aamma piffissap ingerlanerani Ammassallip Radioanut attaveqartartut ikiliartuinnavissimallutik.

VHF-imut MF-imullu maligaasat manna tikillugu Ammassallip Radioanit sullinneqartarsimasut ullumimiit Aasiaat Radioannit sullinneqartalissapput.

Sumiiffiit sulliffiusut sullissinerlu allannguuteqassanngillat, atuisunullu allannguutaasussatuaq tassaavoq siunissami sinerissami radioqarfimmut attaviginnikkaangamik Aasiaat Radioannik oqartalernissaat.

- Ileqqutoqqamisullu Ammassallip Radioanik oqartoortoqassagaluarpat, attaveqartut Aasiaat Radioanut ingerlateqqinnissaat isumagissaqqaarpagut, sinerissami radioqarfinnut pisortaq Carl Johan Colberg oqarpoq.

Taanna ukiut 86-it radioqarfiusimasoq iluamik inuulluaqquniarlugu maanna Tasiilamiippoq, Radioqarfimmi sulisimasut allanik suliaqartussanngormata matunera suliffissaaleqinermik kinguneqarnavianngilaq. Sulisut pingasut Tasiilamiiginnassapput, silasiutinik qullartittakkanik qullartitsisassallutik, sulisut allat tallimat sinerissami suliffinnut allanut nuunneqassapput.

Sinerissami radioqarfiit ukiumut 10.000-it missaannik attaveqarfigineqartarput. Taakkunannga 400-t missaat immami ajunaalernermik kalerrisaarutaasarlutik, motooriiartuniit umiiarnernut, attaveqartullu sinneri imarsiortunit angerlamut sianernianit attaveqartuusarlutik, imaluunniit angalasut angallavimminnik nalunaarutiginninniartut, radioqarfiillu angalasut apuuffissaminnut apuulluarnersut nakkutigisarpaat.