Ammasarfiit sivikillineqassanngillat
Ukiuni tallimani isumaqatiginniutigineqareerluni aningaasaqarnermut ataatsimiititaliap decembarimi itigartereeraalu isumaqatigiissutissaq nutaaq maanna ilutsinnialerunarpoq.
Nunaqarfimmiunummi kiffartuussinissinerup ajorteriarnissaanik isumaqatigiissutissaagaluaq kinguneqartussaammat ataatsimiititaliap ersarissumik isoreeraalu nutaamik isumaqatigiissusiortoqarnialerpoq.
Ukiunimi tullinnguuttuni tallimani pisiniarfiit ammarsarfiisa sivikillineqannginnissaat anguniarlugu Namminersorlutik Oqartussat KNI-lu akunnerminni 16 millioner koruunit nassaarisinnaasimavaat, isumaqatigiissutissaagaluarmi naapertorlugu kioskit sapaatip akunnerani sivikinnerpaamik nalunaaquttap akunnerini 10-ni ammasarnissaat naatsorsuutigineqaraluarpoq pisiniarfiillu sapaatip akunneranut sivikinnerpaamik 20-ni ammasaagaluarlutik.
Isumaqatigiissutissarli suli qulakkeeerneqanngilaq. Aningaasanut ataatsimiititaliap apeqqutit assigiinngitsut akineqarnissaat pisariaqartippaat, tassalu pisiniarfiit 2012-mit 2016-mut ammasarfiisa qulakkeerneqarnissaanni, apeqqutit akineqareerpata isumaqatigiissut aatsaat qulakkeerneqarsinaasorigamikku.
Naalakkersuisunut paasissutissiinermini ataatsimiititaliap naalakkersuisut sakkortuumik assuarlerpai nunaqarfiillu peqatigiiffiata KANUNUPE-mut tusarniaaneq qanoq ingerlanneqarsimanersoq ataatsimiititaliap paaserusunnerarlugu, tamatumalu saniatigut Naalakkersuisut KANUNUPE-mut qanoq isummersorsimanersut allaganngorlugu tigorusussimallutikku.
Sorpiaat amigaatigineqarnersut aningaasaqarnermut ataatsimiititaliap siulittaasuata Andreas Uldummip radioaviisimut itilerusunngilai, inissitassalli arlaqanngitsut amigaatigineqarsimanerarlugit.
Demokraatit politikkikkut oqaaseqartartuata kisiartaalluni isumaqatigiissutissaagaluaq akuersaarsimavaa, massa partiit sinnerisa nunaqarfiit isorliunerusullu kiffartuunnerisa ajorseriarnissaraluat inuit pisinnaatitaaffiinik unioqqutitsinerarlugu suaartaatigissaqqaaraat.