Ammartakkat aallartilerput
Juulliararnissaata tungaanut nalunaaqutaq tallimaniit arfineq-marlup qeqqata tungaanut KNR-TV meeqqanut meerarpaluttunullu aallakaatitassianik pingasunik takutitsisassaaq. Nalunaaqutaq tallimanut takutinneqartassaaq Julefadango, Peter Pedal inuttaralugu, Ammartagaq kalaallisut nalunaaqutaq arferngup-qeqqa takutinneqartassaaq taavalu nalunaaqutaq arfinermut juullimut oqaluttualiaq nutaaq, Pagten, aallakaatinneqartassalluni.
Internetsersinnaasut aamma qilanaalereersinnaapput, nutaaliortoqarsimavormi - juullimut ammartagaq nutaaq qarasaasiakkut ullut tamaasa malinnaavigineqarsinnaavoq. Nunatsinni immaqa nuannarineqassaqaaq, dr.dk aqqutigalugu taanna takuneqarsinnaassaaq, ammartagarlu taanna Kalaallit Nunaannut tunngassuteqarpoq!
Ammartagaq taanna ateqarpoq "Perlevenner i Grønland", "Kalaallit Nunaanni kammagiit", inuttaappullu arabiamiut marluk, Biilo aamma T-mik imminnut taagortut, taakkulu aasap ingerlanerani Nunatsinnukarput, puisinniarlutillu qimmit qimuttut eqimattat kaaqisut nerisillugit misilillugit.
Danmarkip Radioata nittartagaani allaaserisaq naapertorlugu "Kalaallit Nunaanni kammagiit"-nni takutinniarneqarpoq inuusuttuaqqat inersimasullu kulturii, arabiamiut kulturii kalaallillu piniartut kulturii. Ammartakkami Tupacip Tupilak naapippaa - tassagooq pujortaat imermik immertagaq, tupanillu naatitarsunnitsunik akusagaq, taavalu kamiit naapinnerat takutinniarneqarpoq.
